ՔՊ-ն ընդդիմադիրներին չի՞ զրկի մանդատներից. Փաշինյանի թիմակցի ուշագրավ հայտարարությունը. ՏԵՍԱՆՅՈւԹ

Ընդդիմադիր պատգամավորներին մանդատներից զրկելու համար Սահմանադրական դատարան դիմելու հարցը Ազգային ժողովի խորհուրդը քննարկելու է վաղը՝ աշխատանքային օրվա ավարտից հետո հրավիրված արտահերթ նիստում։ Խորհրդարանի կայքում հրապարակվել այն պատգամավորների անունները, որոնք ՍԴ-ի որոշմամբ, հնարավոր է, դադարեցնեն խորհրդարանական գործունեությունը։

Նիկոլ Փաշինյանի հրաժարականի պահանջով փողոցային ակցիաներին մասնակցած պատգամավորները բացակայությունների պատճառով իրենց մանդատներից զրկելու գործընթացը քաղաքական հետապնդում են համարում։

Ըստ ամենայնի վաղը ԱԺ խորհրդի նիստին ներկա կլինեն միայն ՔՊ-ականներ։ Հիշեցնենք՝ խորհրդի կազմում են ԱԺ նախագահը, երեք տեղակալները, խմբակցությունների ղեկավարները և մշտական հանձնաժողովների ղեկավարները։ Խորհրդի կազմի երկու ընդդիմադիր անդամների՝ Իշխան Սաղաթելյանին և Վահե Հակոբյանին ՔՊ-ն է հեռացրել՝ պաշտոնանկ անելով և զրկելով խորհրդում ձայնի իրավունքից, Արմեն Գևորգյանն էլ ինքնակամ է հեռացել՝ հրաժարվելով հանձնաժողովի նախագահի պաշտոնից։ Ստացվում է՝ ընդդիմությունից խորհրդի նիստին մասնակցելու իրավունք ունեն միայն «Հայաստան» և «Պատիվ ունեմ» խմբակցությունների ղեկավարները և Թագուհի Թովմասյանը, որը չհրաժարվեց ՄԻՊ և հարակից հարցերի հանձնաժողովի նախագահի պաշտոնից։

Արդյո՞ք ՔՊ-ականները վաղը դրական եզրակացություն կտան ԱԺ խորհրդի նախագծին՝ ընդդիմադիրներին մանդատներից զրկելու հարցով ՍԴ դիմելուն։ ՔՊ վարչության անդամ, պատգամավոր Արսեն Թորոսյանն ակնարկում է՝ իշխող ուժը պատգամավորներին մանդատներից զրկելու հարցով բարձր դատարան չի դիմի։

Այուհանդերձ, Արսեն Թորոսյանն ուղիղ չհայտարարեց, որ նախագծին դեմ են քվեարկելու։ Իշխան Սաղաթելյանը նշում է՝ իշխանության այս գործողություններն ընդդիմություն անպատասխան չի թողնելու։

Նարեկ Կիրակոսյան

Մանրամասները` տեսանյութում։