Նավթից և գազից Ռուսաստանի եկամուտները հասել են նվազագույնի

Ռուսական նավթագազային կորպորացիաների եկամուտները հունիսին նվազել են ևս 154 մլրդ ռուբլով կամ 18%-ով։ Իսկ ռեկորդային ապրիլ ամսվա համեմատությամբ՝ ավելի քան կրկնապատկվել են, հայտնում է The Moscow Times-ը։

Նշվում է, որ Ռուսաստանի կառավարության եկամուտներին հարվածել է Հնդկաստանի և Չինաստանի կողմից նավթի գնումների նվազումը, գազի մատակարարման կրճատումը եվրոպական երկրներ և ռուբլու կտրուկ ամրապնդումը Մոսկվայի բորսայում։

Այսպես, հունիսին դաշնային բյուջեն ստացել է նավթի և գազի տարեկան եկամուտների նվազագույն չափը՝ 717 միլիարդ ռուբլի, ինչը բխում է ֆինանսների նախարարության գործառնական տվյալներից։
Առաջին եռամսյակում ածխաջրածինների արտահանմամբ բյուջեն ամսական միջինը վաստակել է գրեթե մեկ տրիլիոն ռուբլի, և այդ ժամանակից ի վեր նավթագազային ռենտայի գետը ծանծաղել է գրեթե մեկ քառորդով։
Հնդկաստանը և Չինաստանը, որոնք ռուս նավթագործներին փրկում էին նավթի առևտրականների և եվրոպացի սպառողների բոյկոտից, սկսեցին կորցնել հետաքրքրությունը Ռուսաստանի Դաշնության բարելների նկատմամբ՝ չնայած երկնիշ զեղչերին: Օրական 2,1 միլիոն բարելից Ասիա մատակարարումները նվազել են մինչև 1,9 միլիոն և շարունակել են նվազել հուլիսին՝ ամսվա առաջին շաբաթվա ընթացքում հասնելով օրական 1,76 միլիոն բարել, հաշվարկել է Bloomberg-ը։

Ռուսական նավթի և նավթամթերքի ընդհանուր արտահանումը, ըստ Միջազգային էներգետիկ գործակալության, հունիսին նվազել է մինչև օրական 7,4 միլիոն բարելի և դարձել ամենացածրը 2021 թվականի օգոստոսից ի վեր։
Արագ աճող ռուբլին, որը հունիսին 7 տարվա մեջ առաջին անգամ հասել է մեկ դոլարի դիմաց 50 ռուբլու, գլխացավանք է ավելացրել ֆինանսների նախարարությանը, որն այս տարի պետք է ինդեքսավորի պետական աշխատողների կենսաթոշակները և աշխատավարձերը, ինչպես նաև զեկուցի անկում ապրող տնտեսությանը աջակցող միջոցառումների մասին։
Հունիսին դոլարի փոխարժեքը իջել է 10 ռուբլով, իսկ նման անկման յուրաքանչյուր ռուբլին տարեկան եկամուտով բյուջեին արժենում է 130 մլրդ ռուբլի, լրագրողներին ասել է ֆինանսների նախարար Անտոն Սիլուանովը։
2022 թվականի բյուջեն առանց դեֆիցիտի կատարելը դժվար թե հնարավոր լինի, զգուշացնում են Raiffeisenbank-ի վերլուծաբանները։

Տաթև Ֆռանգյան