Շրի Լանկայի նախագահը լքել է երկիրը՝ բողոքի զանգվածային ակցիաների ֆոնին

Շրի Լանկայի նախագահ Գոտաբայա Ռաջապակսան լքել է երկիրը տնտեսական ճգնաժամի պատճառով սկիզբ առած զանգվածային բողոքի ցույցերի ֆոնին։ Լրատվական գործակալությունների փոխանցմամբ՝ նախագահը կնոջ և թիկնապահների ուղեկցությամբ Ան-32 ռազմական ինքնաթիռով հեռացել է Մալդիվներ։ Շաբաթ օրվանից, երբ ցուցարարների ամբոխը ներխուժեց նախագահական պալատ, երկրի ղեկավարի գտնվելու վայրն անհայտ էր։  Նախագահի եղբայրը՝ ֆինանսների նախկին նախարար Բասիլ Ռաջապակսան, նույնպես լքել է երկիրը, հայտնում է BBC-ն։

Փողոց դուրս եկած ցուցարարները պահանջում էին երկրի նախագահի ու վարչապետի՝ Ռանիլ Վիկրամասինգեի հրաժարականը։  BBC-ն նշում է, որ նախագահի հրաժարականը կարող է իշխանական վակուում ստեղծել մի երկրում, որին ֆինանսական ճգնաժամը հաղթահարելու համար անհրաժեշտ է գործող կառավարություն: Տեղացի քաղաքական գործիչները խոսում են ազգային միասնության նոր կառավարություն ձևավորելու մասին, սակայն առայժմ որևէ նախանշան չկա, որ նրանք մոտ են համաձայնության։ Պարզ չէ նաև՝ արդյո՞ք հասարակությունը կընդունի նրանց հնարավոր պայմանավորվածությունները։

Սահմանադրության համաձայն՝ նախագահի հրաժարականի դեպքում նրա լիազորությունները ժամանակավոր անցնում են վարչապետին։ Սակայն դա չի կարող հանգուցալուծել ճգնաժամը, քանի որ Ռանիլ Վիկրամասինգեն նույնպես հանրային աջակցություն չունի․ շաբաթ օրը ցուցարարները հրկիզել էին նրա առանձնատունը։ Նա հայտարարել էր, որ հրաժարական է տալու՝ միասնական կառավարության համար ճանապարհ բացելու նպատակով, սակայն կոնկրետ ժամկետ չի նշել։ Փորձագետները որպես ժամանակավոր նախագահի ամենահավանական թեկնածու նշում են Շրի Լանկայի խորհրդարանի նախագահին, սակայն նա ևս Ռաջապաքսայի համախոհն է և քաղաքացիների համակրանքը չի վայելում:

Տաթև Ֆռանգյան