09.10.2026 | 21:43
Ադրբեջանի դպրոցներում հիջաբ կրելու արգելք է սահմանվել նաև ուսուցիչների համար
Արևմտյան դաշնակիցները Թուրքիային չեն դիմել՝ Սիրիայում նոր ռազմական գործողությունը հետաձգելու համար․ Թուրքիայի ՊՆ
Քաղաքականություն
11.07.2022 | 15:57
Թուրքիայի պաշտպանության նախարար Հուլուսի Աքարը հայտարարել է, որ Սիրիայի հյուսիսում «ահաբեկիչների» դեմ ռազմական գործողությունների հետաձգումը կամ չեղարկումը բացառվում է, գրում է «Ահվալ» գործակալությունը։
Աքարը հերքել է, թե Մադրիդում կայացած ՆԱՏՕ-ի գագաթնաժողովում Արևմտյան դաշնակիցները Թուրքիային դիմել են՝ զերծ մնալ Սիրիայում ռազմական գործողությունից։
«Ինչպես մեր նախագահ Ռեջեփ Թայիփ Էրդողանն է ասել՝ մեզ համար բացառվում է լսել, ընդունել նման բան։ Նախագահ Էրդողանի գլխավորությամբ մենք արել ենք այն ամենը, ինչ պետք է արվի մեր երկրի և մեր հողերի անվտանգությունն ապահովելու համար, և մենք վճռական ենք ու կարող ենք դա անել ապագայում»,- ասել է Աքարը։
Ավելի վաղ Էրդողանը հայտարարել էր Սիրիայում նոր ռազմական գործողություն սկսելու մասին։
«Ոչ ոք չի կարող մեզ ասել, որ մենք ինչ-որ բան ենք անում միջազգային իրավունքի դեմ Սիրիայի հյուսիսում մեր գործողություններում։ Որպեսզի չվնասենք անմեղ մարդկանց, շրջակա միջավայրը և պատմական ու կրոնական կառույցները, մենք շատ զգույշ և շատ զգայուն ենք ինչպես պլանավորման, այնպես էլ կատարման փուլում»,- ասել է Աքարը։
Հավելենք, որ Թուրքիան 2016 թվականից ի վեր երեք ռազմական գործողություն է իրականացրել Սիրիայի հյուսիսում։
Էմմա Չոբանյան
