09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Բնակարանային հերթացուցակում 1158 զինծառայողներ են ընդգրկված․ Պապիկյանը ներկայացրեց նախկինում չկատարված պարտավորությունները․ ՏԵՍԱՆՅՈՒԹ
Հասարակություն
07.07.2022 | 11:59
ՀՀ պաշտպանության նախարար Սուրեն Պապիկյանն ԱԺ նիստում «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքի նախագծի քննարկման ժամանակ անդրադառնալով այն քննարկումներին, թե սպաներին բնակարան տրամադրելու նախաձեռնությունը նոր չէ, ներկայացրեց, թե նախկինում չկատարված ինչ պարտավորություններ կան այս պահին կառավարության ուսերին:
«Այս պահին ՀՀ պաշտպանության նախարարության բնակարանային հաշվառման հերթացուցակում ընդգրկված են 1188 զինծառայողներ, 805 զինվորական կենսաթոշակառուներ: Ընդհանուր առմամբ 1993 զինծառայողի մասով նախկինից չմարված պարտավորություններ կան: Այսինքն՝ խոսքը շուրջ 2000 շահառուի մասին է»,- նշեց Պապիկյանը:
Նախարարը նաև ներկայացրեց, թե կառավարությունը 2019-ից մինչև այսօր բնակարանով ապահովման ինչքան պարտավորություն է մարել. «2019 թվականից առ այսօր ՊՆ կենտրոնական բնակարանային հանձնաժողովի կողմից քննարկվել և բնակարան ձեռք բերելու համար բնակարանի գնման վկայագրի միջոցով անհատույց պետական ֆինանսական աջակցություն է տրամադրվել 557 զինվորական կենսաթոշակառուի: Նրանք այն անձինք են, ում նկատմամբ պետությունը ունեցել է պարտավորություն, պարտավորությունները մարվել են»:
ՊՆ համակարգի սպայական և ավագ ենթասպայական կազմերի պայմանագրային զինծառայողների կողմից բնակարան կամ բնակելի տուն ձեռք բերելու կամ կառուցելու նպատակով մատչելի և արտոնյալ պայմաններով երկարաժամկետ հիփոթեքային վարկավորման ծրագրով 2019 թվականից մինչև օրս 472 զինծառայողներ հիփոթեքային վարկավորման ծրագրով ձեռք են բերել բնակարաններ: «Այսինքն՝ ընդհանուր առմամբ շուրջ 1000 զինծառայողի կարիքներ հոգացել ենք 2019-2021 թվականներին»,-ասաց նախարարը:
Ամեն տարի կառավարության որոշմամբ 500 զինծառայող կարող է օգտվել ծրագրից: Նրանք վիճակահանության միջոցով այդ իրավունքը ձեռք են բերում: «Այս տարի մենք 500 տեղի համար ունենք 1013 դիմորդ: Բնականաբար 500 տեղի համար արդեն իսկ իրենց իրավունքները ստացել են մեր զինծառայողները, վարչապետի որոշմամբ մնացած 513 շահառուի կարիքները ևս կբավարարենք կառավարության առաջիկա նիստերից մեկում, փաստաթղթերն արդեն իսկ շրջանառվում են»,-հայտնեց նախարարը:
Պաշտպանության նախարարը հավելեց, որ թեև այդ պարտավորությունները ժառանգված են, դրանք իրենցն են՝ կառավարությանը, և իրենք այդ պարտավորությունները պետք է կատարեն: «Մենք հետևողական ենք ոչ միայն նախկինում եղած պարտավորությունների նկատմամբ, այլ նաև որպես շահառուի չգրանցված գործող սպաների կարիքները ևս հիփոթեքային արտոնյալ վարկավորմամբ կարգավորելու համար»,- նշեց Պապիկյանը:
Մանրամասները՝ տեսանյութում:
