Թուրքական ընկերությունը Ադրբեջանի ՊՆ-ի դեմ հայց է ներկայացրել Ստամբուլի դատարան

Թուրքական տեքստիլ ընկերություններից մեկը Ստամբուլի դատարան հայց է ներկայացրել Ադրբեջանի Պաշտպանության նախարարության դեմ։ Այս մասին գրում են ադրբեջանական լրատվամիջոցները՝ վկայակոչելով Թուրքիայի ԶԼՄ-ին։

Ընկերությունը պնդում է, որ Ադրբեջանի ՊՆ-ից չի կարողացել ստանալ վաճառած կտորի գումարը, որը կազմում է 157,000 դոլար։

Նշվում է, որ Ստամբուլի 7-րդ առևտրային առաջին ատյանի դատարանում առկա պարտքի վերաբերյալ հայցի կողմերն են Öztek Tekstil Terbiye Tesisleri San. ve Tic. AŞ-ը և Ադրբեջանի Պաշտպանության նախարարությունը։

Մեղադրական եզրակացության համաձայն՝ հայցի առիթ հանդիսացող հարցը կապված է 2015 թվականի պայմանագրի հետ, որով Öztek Tekstil-ը 2017 թվականից Պաշտպանության նախարարությանը զինվորական համազգեստի կտոր է մատակարարում, սակայն վաճառված ապրանքի համար ոչ մի գումար չի վճարել։

Այն բանից հետո, երբ պարտքի վճարման բանակցությունները արդյունք չեն տվել, թուրքական ընկերությունը դիմել է դատարան, որը հայցն ընդունել է մի քանի օր առաջ։ Սակայն քանի որ ադրբեջանական կողմը չի ներկայացրել իր դիրքորոշումը հայցվորի պահանջների վերաբերյալ, դատական ​​նիստը հետաձգվել է մինչև նոյեմբերի կեսերը։

Թուրքական լրատվամիջոցները գրում են, որ Öztek Holding-ը, որը պատկանում է Ահմեդ Շևքի Օզթեքին, գրեթե 50 տարի աշխատում է Թուրքիայի տեքստիլ ոլորտում և արտադրում է ռազմական նշանակության արտադրանք՝ ապահովելով Թուրքիայի զինված ուժերի քողարկման միջոցների կարիքների մոտ 60 տոկոսը։

Էմմա Չոբանյան