09.10.2026 | 18:34
Պուտինը, Փաշինյանն ու Ալիևը Թուրքմենստանում 15 րոպեանոց չծրագրված հանդիպում են անցկացրել
Թեհրանում Իրանի և Ադրբեջանի ԱԳ նախարարները քննարկել են Ղարաբաղյան հակամարտության խաղաղ կարգավորումը
Քաղաքականություն
04.07.2022 | 15:08
Թեհրանում Իրանի ԱԳ նախարար Հոսեյն Ամիր Աբդոլլահիանն այսօր հանդիպել է Ադրբեջանի ԱԳ նախարար Ջեյհուն Բայրամովի հետ, գրում է իրանական Mehr գործակալությունը։
Հանդիպումից հետո կայացած մամուլի ասուլիսում Իրանի ԱԳ նախարարը հայտնել է, որ Բայրամովի հետ քննարկել են մի շարք հարցեր, այդ թվում՝ Թեհրան-Բաքու կապերի և համագործակցության զարգացումը, երկրների տարածքային ամբողջականության պահպանումը։ Նշելով, որ իրենց հանդիպման ընթացքում ընդգծված մեկ այլ թեմա է եղել Ղարաբաղյան հակամարտության խաղաղ կարգավորումը, Ամիր Աբդոլլահիանը հայտարարել է, որ հակամարտության սկզբից Իրանը հայտարարել է ճգնաժամը երկխոսության միջոցով լուծելու պատրաստակամության մասին։
«Մենք պատրաստ ենք, որ մնացած հարցերը լուծվեն կողմերի տարածքային ամբողջականության և ինքնիշխանության հարգման հիման վրա, երկխոսության ու դիվանագիտության միջոցով»,- հավելել է նա։
Խոսելով տարածաշրջանային ձևաչափերի կարևորության մասին՝ Իրանի ԱԳ նախարարը հայտնել է, որ նախորդ շաբաթ իր՝ Անկարա կատարած այցի ժամանակ Թուրքիայի ԱԳ նախարարի հետ պայմանավորվել են եռակողմ հանդիպում անցկացնել Թեհրանում՝ Իրանի, Թուրքիայի և Ադրբեջանի ԱԳ նախարարների մասնակցությամբ։
Աբդոլլահիանը նաև ասել է, որ այսօր ավելի ուշ իրանական և ադրբեջանական կողմերի միջև կքննարկվի Ադրբեջանի նախագահի Իրան այցը։
Բայրամովը հանդիպելու է նաև Իրանի նախագահ Էբրահիմ Ռաիսիի և խորհրդարանի խոսնակ Մոհամմադ Բաղեր Ղալիբաֆի հետ։
Էմմա Չոբանյան
