Կենացների մակարդակով կարևորում են արվեստը, բայց հատկացնում են ամոթալի գումարներ. Կարեն Ավետիսյան․ ՏԵՍԱՆՅՈՒԹ

«Ինչպես շատ ասպարեզներ Հայաստանում, հայկական կինոն էլ խմորման, անցումային փուլում է: Ունենք առանձին լավ ֆիլմեր, բայց դժվար է ասել, որ ունենք կինո` որպես ալիք: Երկար ժամանակ մարդիկ նայում էին հայկական ֆիլմեր, բայց ինքնաիդենտիֆիկացիայի բացակայություն կար, նրանք ապրում էին նոր Հայաստանում, նոր Երևանում, բայց դրա արտացոլումն էկրանին չէին տեսնում: Հիմա գոնե ունենք սերունդ, որը փորձում է այս օրը պատկերել»,- Factor TV-ի հետ զրույցում նման տեսակետ է հայտնում «Ոսկե Ծիրան» միջազգային կինոփառատոնի գեղարվեստական տնօրեն, կինոքննադատ Կարեն Ավետիսյանը:

Նա անդրադառնում է կինոյի ոլորտին Ազգային կինոկենտրոնի կողմից տրամադրվող գումարներին.

«Դրանք ամոթալի գումարներ են: Մեր բոլոր ֆիլմերին մեկ տարում տրամադրվող գումարով Եվրոպայում ընդամենը մեկ ֆիլմ է նկարվում: Այս պատկերը եղել է բոլոր իշխանությունների օրոք:

Ցավոք, Հայաստանում մշակույթը երկրորդական, ստվերային գոտում է եղել բոլոր իշխանությունների օրոք: Կենացների մակարդակով կարևորում են արվեստը, բայց հենց հերթը հասնում է սուբսիդավորմանը, հետ են կանգնում»:

Կարեն Ավետիսյանը խոսում է նաև առաջիկայում սպասվելիք «Ոսկե Ծիրան» 19-րդ կինոփառատոնի մասին, որին ներկայացված է լինելու 20 հայկական ֆիլմ. «Մեզ մոտ արդեն միջազգային դպրոց ստեղծելու գաղափար է խմորվում, փառատոնը կդառնա հարթակ դրսից եկած հյուրերի և մեր պոտենցիալ ուսանողների համար: Եթե նախկինում յոթ օր տևող վարպետության դասեր էին անցկացվում, հիմա արդեն պլանավորում ենք, որ դրանք ամբողջ տարվա կտրվածքով կազմակերպվեն»:

Մանրամասները` տեսանյութում:

Աննա Բաբաջանյան