09.10.2026 | 17:55
Հրազդանում ԸԸՀ քարտուղարը քաշքշել և սպառնացել է դիտորդին․ «Ականատես»
Էրդողանը հայտնել է, որ Շվեդիան մինչ այժմ Թուրքիայի «պահանջած 73-ից 3-4 ահաբեկչի» է արտահանձնել
Քաղաքականություն
01.07.2022 | 16:02
Անկարան Հելսինկիից և Ստոկհոլմից կոնկրետ գործողություններ է ակնկալում ահաբեկչական կազմակերպությունների դեմ պայքարում, որոնք սպառնում են Թուրքիայի ազգային անվտանգությանը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Մադրիդում ՆԱՏՕ-ի գագաթնաժողովում իրեն ուղեկցած լրագրողներին տված հարցազրույցում, գրում է «Անադոլու» գործակալությունը։
«Շվեդիայի և Ֆինլանդիայի հավաստիացումները, իհարկե, կարևոր են, սակայն գլխավորն իրական գործողություններն են։ Թուրքիան բազմիցս բախվել է երկակի չափանիշների ահաբեկչության դեմ պայքարում և կգործի համապատասխանաբար»,- ասել է Էրդողանը։
Նրա խոսքով՝ Շվեդիան արդեն արտահանձնել է «3-4 ահաբեկչի» ։
«Շվեդիան 73 ահաբեկչից, որոնց արտահանձումը մենք պահանջել ենք, 3-4-ին է արտահանձնել, բայց դա բավարար չէ»,- ասել է Էրդողանը։ Նա հավելել է, որ Արդարադատության, Արտաքին գործերի նախարարությունները և հատուկ ծառայությունները ուշադիր հետևելու են այդ գործընթացին։
Թուրքիայի նախագահը նաև սպառնացել է Շվեդիային ու Ֆինլանդիային։
«Ամեն ինչ կախված է Շվեդիայի և Ֆինլանդիայի հետագա գործողություններից։ Եթե նրանք սխալ քայլեր ձեռնարկեն, ապա Թուրքիան իր տրամադրության տակ ունի փաստաթղթեր, և մենք կգործենք»,- ասել է Էրդողանը։
Էմմա Չոբանյան
