Պուտինն Ուկրաինայի դեմ պատերազմին նախապատրաստվել է առնվազն մեկ տարի․ Շոլց

Գերմանիայի կանցլեր Օլաֆ Շոլցը հայտարարել է, որ Ռուսաստանի նախագահ Վլադիմիր Պուտինն Ուկրաինայի դեմ պատերազմին նախապատրաստվել է առնվազն մեկ տարի՝ նախքան այն հրահրելը, և կանխատեսել, որ նա, ամենայն հավանականությամբ, կկարողանա «երկար ժամանակ» շարունակել ձգձգված հարձակումը։ Շոլցն այս մեկնաբանություններն արել է CBS News-ի «Face the Nation»-ի մոդերատոր և արտաքին հարաբերությունների գլխավոր թղթակից Մարգարեթ Բրենանին Մադրիդում ՆԱՏՕ-ի գագաթնաժողովի ժամանակ տված հարցազրույցում։

Ուկրաինայի դեմ պատերազմը ձգվում է ավելի քան չորս ամիս, և Ռուսաստանն օգտագործում է իր կրակային ուժը՝ նոր ձեռքբերումներ ունենալու համար: Ամերիկյան հետախուզության գնահատականներով՝ Ռուսաստանը ներկայում տիրապետում է Ուկրաինայի տարածքի մոտ 20%-ին, հիմնականում՝ երկրի արևելքում:

Պատասխանելով հարցին, թե ե՞րբ կսպառվի պատերազմը շարունակելու Ռուսաստանի հնարավորությունը՝ ֆինանսական միջոցներն ու զենքը, Շոլցն ասել է, որ ոչ ոք իրականում չգիտի, սակայն Պուտինի երկար նախապատրաստվելը նշանակում է, որ նա պատրաստվել է շարունակական պատերազմի:

«Նա շատ մեծ երկրի ղեկավար է, որտեղ ապրում են շատ մարդիկ, շատ միջոցներով, և նա մղում է այս դաժան պատերազմը, նա դրան պատրաստվել է շատ երկար։ Կարծում եմ՝ այս պատերազմը մղելու որոշումը կայացվել է դրա մեկնարկից մեկ տարի առաջ կամ միգուցե դրանից էլ առաջ, քանի որ նա նախապատրաստվել է։ Եվ այսպես, նա ի վիճակի կլինի շարունակել պատերազմը դեռ երկար ժամանակ»,- ասել է Շոլցը։

Տաթև Ֆռանգյան