18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
ՄԱԿ-ի ԱԽ վեց երկրներ դատապարտել են ՌԴ-ի հրթիռային հարվածները Ուկրաինայում քաղաքացիական օբյեկտներին․ Կիևը պահանջել է Մոսկվային հեռացնել կազմակերպությունից
Քաղաքականություն
29.06.2022 | 10:46
ՄԱԿ-ի Անվտանգության խորհրդի անդամ վեց երկրները, ինչպես նաև Ուկրաինայի մշտական ներկայացուցիչը համատեղ հայտարարություն են տարածել, որում «խստորեն դատապարտում են 2022 թվականի հունիսի 25-27-ն ընկած ժամանակահատվածում Ուկրաինայի տարածքում ռուսական հրթիռային հարվածների ուժեղացումը՝ ուղղված բնակելի տարածքներին և քաղաքացիական ենթակառուցվածքներին», փոխանցում է DW-ի ռուսական ծառայությունը։
Հունիսի 28-ին Անվտանգության խորհրդի արտահերթ նիստի մեկնարկից առաջ հրապարակված փաստաթղթում Ֆրանսիան, Իռլանդիան, Նորվեգիան, Մեծ Բրիտանիան, ԱՄՆ-ը և Ալբանիան Ռուսաստանից պահանջում են անհապաղ դադարեցնել ռազմական գործողությունները և դուրս բերել զորքերն Ուկրաինայից։
Ուկրաինայի նախագահ Վլադիմիր Զելենսկին տեսակապով դիմել է Անվտանգության խորհրդի նիստի մասնակիցներին, որը հրավիրվել էր հունիսի 27-ին Կրեմենչուկի առևտրի կենտրոնի վրա ռուսական կողմի հրթիռային հարձակման կապակցությամբ։ Մեղադրելով Ռուսաստանին «ամենօրյա հարձակումներ» իրականացնող «ահաբեկչական պետություն» դառնալու մեջ՝ նա կոչ է արել հեռացնել Մոսկվային ՄԱԿ-ից։
Զելենսկին ՄԱԿ-ին կոչ է արել ստեղծել միջազգային տրիբունալ՝ «ուկրաինական հողում ռուս զավթիչների գործողությունները» հետաքննելու և Ռուսաստանին պատասխանատվության ենթարկելու համար։
«Մենք պետք է շտապ գործենք և ամեն ինչ անենք, որպեսզի ստիպենք Ռուսաստանին դադարեցնել սպանությունները»,- ասել է Զելենսկին՝ զգուշացնելով, որ հակառակ դեպքում՝ Ռուսաստանի «ահաբեկչական գործունեությունը» կտարածվի եվրոպական այլ երկրներում և Ասիայում, հատկապես՝ Բալթյան երկրներում, Լեհաստանում, Մոլդովայում և Ղազախստանում։
Կոչ անելով Ռուսաստանին հեռացնել ՄԱԿ-ից՝ Զելենսկին վկայակոչել է ՄԱԿ-ի կանոնադրության 6-րդ հոդվածը, որտեղ ասվում է, որ կազմակերպության անդամը, որը համառորեն խախտում է սույն կանոնադրության սկզբունքները, կարող է Գլխավոր վեհաժողովի կողմից հեռացվել կազմակերպությունից՝ Անվտանգության խորհրդի երաշխավորմամբ։ Ռուսաստանին բացառելը, սակայն, գրեթե անհնար է, քանի որ նա, որպես Անվտանգության խորհրդի մշտական անդամ, կկարողանա օգտագործել իր վետոյի իրավունքը՝ արգելափակելու նրան բացառելու ցանկացած փորձ։
Տաթև Ֆռանգյան
