ՌԴ-ն և Ադրբեջանը համատեղ մասնակցում են Արցախի գրավյալ տարածքների վերականգնմանը

Ադրբեջանի և Ռուսաստանի համատեղ մասնակցությունը Արցախի գրավյալ տարածքների վերականգնմանը կարևոր պահ է երկկողմ համագործակցության հարցում։ Այս մասին Բաքվում տեղի ունեցած ասուլիսում հայտարարել է Ադրբեջանի ԱԳ նախարար Ջեյհուն Բայրամովը։

Նա հայտնել է, որ Արցախի գրավյալ տարածքներում արդյունաբերական պարկում ստեղծվել է ռուս-ադրբեջանական համատեղ լոգիստիկ կենտրոն։ Բայրամովն ասել է, որ Ադրբեջանը Ռուսաստանից 20,000 տոննա երկաթուղային ռելսեր է գնելու՝ Հորադիզ-Աղբենդ երկաթուղու կառուցման համար։

«Ռուսական ընկերությունների մասնակցությամբ կարևոր նախագծերից կարելի է նշել երկաթուղու վերականգնումը, Հորադիզ-Աղբենդ երկաթուղու նախագծի համար երկաթուղային ռելսերի գնումը։ Ռուսական ընկերությունների հետ 20 հազար տոննա երկաթուղային ռելսերի գնման պայմանագիր է կնքվել, պայմանագրի մեկ երրորդն արդեն ավարտված է»,- տեղեկացրել է Բայրամովը։

Նա նշել է, որ Արցախի գրավյալ տարածքներում գործում են տասնյակ ռուսական ընկերություններ, և հիշեցրել, որ Ռուսաստանի ու Ադրբեջանի պետական ​​մարմիններն ու բիզնես կառույցները մշտական ​​կապի մեջ են։

ՌԴ ԱԳ նախարար Սերգեյ Լավրովն իր հերթին ասել է, որ ռուսական ընկերությունները շահագրգռված են այդ ծրագրերին մասնակցությամբ։

«Մենք վերահաստատում ենք ռուսաստանյան տնտեսական օպերատորների շահագրգռվածությունը՝ միանալու ադրբեջանական տարածքների հետկոնֆլիկտային վերականգնմանը»,- ընդգծել է ՌԴ ԱԳ նախարարը։

Էմմա Չոբանյան