Ընտրական իրավունքը ստորադասվում է հարմարությանը․ սա հետքայլ է․ Վարդինե Գրիգորյանը՝ Ընտրական օրենսգրքի փոփոխությունների մասին․ ՏԵՍԱՆՅՈՒԹ

ԱԺ պետական-իրավական հարցերի մշտական հանձնաժողովը հրավիրել է խորհրդարանական լսումներ՝ քննարկելու ««ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և հարակից օրենքների նախագծերի փաթեթը։

«Ես դեռ մտածում եմ՝ ո՞րն է նախագծի հետ կապված ամենամեծ խնդիրը. այն, որ ՀՀ արդարադատության նախարարությունը ոնց որ թե դեռ գույքագրո՞ւմ է խնդիրները, բայց արդեն դրանց վերաբերյալ ներկայացվում է նախագիծ՝ իբրև թե դրանց լուծումների վերաբերյալ: Այն, որ այս նախագծի տրամաբանությունը, լուծումները հակասում են նախորդ՝ շատ քննարկված մասնակցային նախագծին ու նաև միջազգային կազմակերպությունների ու մեր առաջարկների՞ն: Այն, որ նույնիսկ խմբակցությունը չի մասնակցել և այստեղ «մենք» ասելով, իրականում խոսում ենք մեկ հոգու մասին, թե՞ ասենք, այն, որ ԿԸՀ-ի կողմից ներկայացված առաջարկությունների բավականին մեծ մասում, փաստացի ընտրական իրավունքը ստորադասվում է հարմարությանը»,- այսօր ԱԺ-ում կազմակերպված լսումների ժամանակ նշեց ՀՔԱՎ գրասենյակի ներկայացուցիչ Վարդինե Գրիգորյանը:

Դիմելով ՀՀ արդարադատության նախարարի տեղակալ Երանուհի Թումանյանցին՝ Գրիգորյանը հարց ուղղեց, թե երբ են ծանոթացել նախագծին. «Նախագիծը որևէ կերպ արտացոլո՞ւմ է այն գույքագրած խնդիրները, որոնք դուք ունեք, որոնք մենք ենք ուղարկել»:

Գրիգորյանի դիտարկմամբ, փաստացի, այժմ չեղարկվում են դրական եզրակացություն ստացած հարցերը և հետքայլ է արվում:

Նա նաև հետաքրքրվեց՝ նախարարությունը պատրաստվո՞ւմ է այս նախագիծը ուղարկել Վենետիկի հանձնաժողով, քանի որ դրանով միայն տեխնիկական փոփոխություններ չեն առաջարկվում, այլ բովանդակային են և հետքայլ են ժողովրդավարական չափանիշներից:

Մանրամասները՝ տեսանյութում: