18.12.2025 | 23:09
Գիտությունն ավելի հաճախ պետք է կապվի արդյունաբերության հետ, որպեսզի արդյունավետությունը հնարավոր լինի չափել. Հակոբ Արշակյան
«Ժողովրդի հաղթանակը պետք է արձանագրվի հենց այսօր՝ Շուշիի ազատագրման օրը». ինչ խոստումներ տվեց ապագա վարչապետ Նիկոլ Փաշինյանը. ՏԵՍԱՆՅՈՒԹ
Քաղաքականություն
08.05.2018 | 12:57
Ազգային ժողովի հատուկ նիստում Հայաստանի Հանրապետության վարչապետի թեկնածու Նիկոլ Փաշինյանն իր հիմնական ելույթն սկսեց Շուշի ազատագրման 26-րդ տարեդարձին նվիրված շնորհավորանքով:
«Հայաստանի Հանրապետության քաղաքացին և հայ ժողովուրդն այնքան ոգևորված են, որքան Շուշիի ազատագրման օրերին, Հայաստանի քաղաքացին և հայ ժողովուրդն առավել քան վստահություն ունեն դեպի ՀՀ ապագան, քան երբևէ:
Մեր երկրում իրականացված ոչ բռնի թավշյա հեղափոխությունը զարմացրել ու հիացրել է ամբողջ աշխարհին, Հայաստանի և հայ ժողովրդի վարկանիշն այսօր ավելի բարձր է, քան երբևէ։ Այսօր Հայաստանի Հանրապետության միջազգային հեղինակությունն ավելի ծանրակշիռ է, քան երբևէ, ինչը մենք պետք է ծառայեցնենք ՀՀ շահերին»,- հայտարարեց Փաշինյանը:
Բուն ելույթում ընդգծեց, որ նոր կառավարության խնդիրն է լինելու Հայաստանում օրենքի և իրավունքի վրա հիմնված ազգային միասնության հաստատումը:
«Բոլոր մարդիկ հավասար են օրենքի առաջ: Հայաստանում արտոնյալներ չեն լինելու և վերջ: Ընտրությունների արդյունքներն այլևս չեն կեղծվելու, ընտրակաշառք չի բաժանվելու և վերջ: Արհեստական տնտեսական մենաշնորհներ չեն լինելու, յուրաքանչյուր ոք կարողանալու է զբաղվել իր ուզած բիզնեսով և վերջ: Մարդու իրավունքները պաշտպանված են լինելու, իշխանությունը փող աշխատելու միջոց չի լինելու, երկրից արմատախիլ է արվելու կոռուպցիան և վերջ»,- վստահեցրեց Փաշինյանը:
Վարչապետի թեկնածուն հորդորեց չկասկածել՝ թեկուզ անցումային ժամանակահատվածում նոր կառավարությունը շրջադարձային փոփոխություններ է իրականացնելու. «Եվ ուզում եմ ևս մեկ անգամ կրկնել, որ այս ամենը իրականացվելու է առանց վենդետաների: Քաղաքական և տնտեսական հետապնդումների էջը այլևս փակված է Հայաստանում»:
Անդրադառնալով Արցախյան հիմնախնդրին Նիկոլ Փաշինյանը շեշտեց. «Ղարաբաղյան խնդրի խաղաղ, միջազգային իրավունքի հիման վրա կարգավորման գործընթացում կարծրատիպերը մեզ համար պարտադիր չեն, կենսական է Արցախի ժողովրդի՝ իր ճակատագիրն ինքնուրույն որոշելու անքակտելի իրավունքի և դրա իրացման միջազգային ճանաչումը: Ղարաբաղյան հիմնախնդրի կարգավորման առումով մենք հանձնառու ենք բացառապես խաղաղ կարգավորմանը, որի հիմքում պետք է ընկած լինի ժողովուրդների իրավահավասարության և ինքնորոշման սկզբունքը: Նոր լիցք պետք է հաղորդել Արցախի Հանրապետության միջազգային ճանաչման գործընթացին, որը աշխարհասփյուռ հայության գործունեության կարևոր ուղղությունը պետք է դառնա»:
Վարչապետի թեկնածուն նաև նշեց, որ ՝ ԵԱՀԿ Մինսկի խմբի շրջանակում պատրաստ է բանակցել Ադրբեջանի ղեկավարի հետ՝ որպես հիմք ունենալով այն սկզբունքային դիրքորոշումը, որոնց մասին ինքը հիշատակեց: «Հարկ եմ համարում, սակայն, ընդգծել՝ բանակցությունները չեն կարող լիարժեք արդյունավետ համարվել, քանի դեռ դրան չի մասնակցել հակամարտության լիարժեք կողմերից մեկը՝ Արցախի ղեկավարությունը, ինչը նախատեսված է Մինսկի խմբի 1992 թվականի մանդատով»,- հավելեց Փաշինյանը:
Մանրամասները՝ տեսանյութում:
