14.04.2026 | 23:28
Կրեմլը վերանայում է ինտերնետի սահմանափակումների նկատմամբ մոտեցումը՝ վախենալով Պուտինի վարկանիշի անկումից․ Bloomberg
Գյուղի համար «Տեսլա» ենք գնում, բայց հոսանք չունենք, որ քշենք. ապոլիտիկ զրույց Արամ Փախչանյանի հետ. ՏԵՍԱՆՅՈՒԹ
Հաղորդաշարեր
11.06.2022 | 21:02
Factor TV-ի A-politic հաղորդաշարի հյուրն է «Այբ» հիմնադրամի հոգաբարձուների խորհրդի նախագահ Արամ Փախչանյանը: Նա սատարում է այն տեսակետը, որ ցանկացած նախարարություն պետք է ունենա գիտահետազոտական կառույց՝ դրանով իսկ կյանքի կոչելով այն տեսլականները, որոնք այդ գերատեսչությունները պետք է ունենան: Կիրառական գիտությունը, Փախչանյանի կարծիքով, պետք է նախարարություններում զարգանա:
Հաղորդման հյուրը կտրականապես դեմ է Գիտությունների ակադեմիայի վերաբերյալ կտրուկ հեղափոխական ծրագրերին: Ըստ նրա, դա գանձ է, որը մենք ստացել ենք նախորդ դարաշրջանից, և դրան պետք է վերաբերվել ամենայն զգուշությամբ: Հայաստանից շատ ավելի մեծ և հարուստ երկրներ չունեն գիտություն՝ այդպես է դասավորվել այդ երկրների պատմությունը: Մեզ համար բարեբախտություն է, որ խորհրդային տարիներին մեր հանրապետությունում շեշտը դրվում էր գիտության վրա, և մենք ունենք որոշակի կադրային և տեխնիկական միջոցներ, որոնք հնարավորություն են տալիս այդ ոլորտում առաջ գնալու, սակայն դրա համար հստակ մշակված համակողմանի քաղաքականություն է պետք։
Արամ Փախչանյանը, ընդհանուր առմամբ, համաձայն է, որ պահանջված մասնագետ լինելու համար պարտադիր չէ բարձրագույն կրթություն ունենալ, և բազմաթիվ հայտնի օրինակներ դա ապացուցում են: Սակայն համալսարանը, այնումենայնիվ, ստեղծում է այն միջավայրը, որում կայանում է ապագա մասնագետը, եթե անգամ աշխատանքի բերումով նա պետք է աշխատի այլ ոլորտում: Դրա համար անհրաժեշտ գիտելիքները հնարավոր է ձեռք բերել, բայց առանցքը, հիմքը ստեղծվում է համալսարաններում:
Մանրամասները՝ տեսանյութում:
