Գերմանիայի Բունդեսթագը հաստատել է պաշտպանության ոլորտի մի քանի միլիարդանոց ներդրումների փաթեթը

Բունդեսթագը հաստատել է ֆինանսական փաթեթը, որը ներառում է մի քանի միլիարդի ներդրումներ պաշտպանության և ենթակառուցվածքների ոլորտներում, գրում է DW-ի ռուսական ծառայությունը։

Նշվում է, որ դժվար բանակցություններից և մի շարք զիջումներից հետո պահպանողական դաշինքը Քրիստոնեա-դեմոկրատական ​​միության (CDU)/Քրիստոնեա-սոցիալական միության (CSU) և Գերմանիայի Սոցիալ-դեմոկրատական ​​կուսակցության (SPD) հետ հասել է Դաշինք 90/Կանաչներ կուսակցության կողմից համաձայնագրի աջակցությանը։

Նրանք միասին Բունդեսթագում ունեն 520 ձայն՝ 31-ով ավելին, քան պահանջվում է երկու երրորդ մեծամասնության համար, որ ահրաժեշտ է Գերմանիայի Հիմնական օրենքում փոփոխությունների կատարման համար։

Գերմանիայի Սահմանադրությունը սահմանել է «պարտքի արգելակ»՝ մեխանիզմ, որով կառավարությունը պետք է խնայողաբար ծախսի բյուջեի միջոցները, և կարող է ծախսել միայն այնքան, որքան վաստակում է: Այժմ Բունդեսթագը հաստատել է Գերմանիայի Հիմնական օրենքի 109-րդ հոդվածում ամրագրված քաղաքականության բարեփոխումը։ «Արգելակը» կարող է թուլանալ պաշտպանական ծախսերի և դաշնային նահանգների կարիքների համար։ Բացի այդ, համաձայնեցվել է 500 միլիարդ եվրոյի հատկացումը հատուկ ենթակառուցվածքային հիմնադրամի համար։

ՔԴՄ առաջնորդ, Գերմանիայի հնարավոր նոր կանցլեր Ֆրիդրիխ Մերցը մարտի 14-ին փաթեթն անվանել էր «հստակ ուղերձ  ործընկերներին և ընկերներին, ինչպես նաև հակառակորդներին՝ ազատության թշնամիներին, որ ի վիճակի են պաշտպանել իրենց»:

Մարտի 13-ին ելույթ ունենալով Բունդեսթագի արտակարգ նիստում՝ Մերցն առաջարկել էր թուլացնել «պարտքի արգելքը» ոչ միայն պաշտպանության հետ կապված, ինչպես նախապես ծրագրված էր, այլ նաև քաղաքացիական պաշտպանության և հետախուզական ծառայությունների ոլորտներում:

Նոր Բունդեսթագում, որի առաջին նիստը տեղի կունենա մարտի 25-ին, պահպանողականները, սոցիալ-դեմոկրատները և կանաչներն այլևս չեն ունենա անհրաժեշտ մեծամասնություն, ուստի կարևոր էր այս փաթեթի ընդունումը։

Թարգմանությունը՝ Էմմա Չոբանյանի