09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Զասը Երևանում կխոսի ՀԱՊԿ ճգնաժամային արձագանքման մեխանիզմների ուղղությամբ աշխատանքի մասին
Քաղաքականություն
07.06.2022 | 13:59
Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Ստանիսլավ Զասը ուրբաթ՝ հունիսի 10-ին Երևանում կմասնակցի ՀԱՊԿ ԱԳ նախարարների խորհրդի նիստին, որի ընթացքում տեղեկություններ կտրամադրի ներկա աշխարհաքաղաքական իրողություններում կազմակերպության ճգնաժամային արձագանքման մեխանիզմների ուղղությամբ աշխատանքի վերաբերյալ։ Այս մասին ՏԱՍՍ-ին հայտնել է ՀԱՊԿ մամուլի քարտուղար Վլադիմիր Զայնետդինովը։
«Հունիսի 10-ին Երևանում ՀՀ ԱԳ նախարար Արարատ Միրզոյանի նախագահությամբ տեղի կունենա Հավաքական անվտանգության պայմանագրի կազմակերպության ԱԳ նախարարների խորհրդի հերթական նիստը, որին կմասնակցի ՀԱՊԿ գլխավոր քարտուղար Ստանիսլավ Զասը»,- նշել է նա։
Զայնետդինովի խոսքով՝ սպասվում է, որ արտաքին քաղաքական գերատեսչությունների ղեկավարները կքննարկեն միջազգային և տարածաշրջանային անվտանգության վիճակը և կազմակերպության անդամ երկրների անվտանգության վրա դրա ազդեցությունը։
«Արտգործնախարարների խորհրդի անդամներին տեղեկություն կտրամադրվի Քարտուղարության և ՀԱՊԿ Միացյալ շտաբի կատարած աշխատանքի մասին՝ ժամանակակից աշխարհաքաղաքական իրողությունների լույսի ներքո կազմակերպության ճգնաժամային արձագանքման մեխանիզմի կատարելագործման ուղղությամբ»,- հավելել է նա։
ՀԱՊԿ անվտանգության կազմակերպություն է, որի անդամներն են Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը։
