13.12.2024 | 09:49
Փաշինյանն աշխատանքային այցով մեկնել է Ռուսաստան
ՀՀ-ն արեց կրիտիկական առաջին քայլը՝ ԱՄՆ-ի տեխնոլոգիայով միջուկային հզորություն, արբանյակ․ առա՛ջ պիտի անցնենք․ Արմեն Խարազյան․ ՏԵՍԱՆՅՈՒԹ
Քաղաքականություն
06.06.2022 | 22:02
Մայիսի սկզբին ԱՄՆ-ում էր ՀՀ ԱԳ նախարար Արարատ Միրզոյանը, ուր հանդիպել էր պետքարտուղար Էնթոնի Բլինքենի հետ, ռազմավարական երկխոսության նիստ էր տեղի ունեցել: Ստորագրվել էր ոչ միայն քաղաքացիական միջուկային էներգիայի ոլորտում համագործակցության մասին հուշագիրը, այլև խոսվել էր ՀՀ-ի պաշտպանական բարեփոխումներում գործակցությունը խորացնելու հնարավորության մասին։
Հունիսի 2-ին ԱՄՆ Եվրոպական հրամանատարության ռազմական համագործակցության տարածաշրջանային վարչության պետ, գնդապետ Ջեֆրի Ռայթի գլխավորած պատվիրակությունը հյուրընկալվել է ՀՀ ՊՆ պաշտպանական ազգային հետազոտական համալսարանում: Քննարկվել են ռազմական կրթության ոլորտի բարեփոխումներին և համագործակցության հեռանկարներին առնչվող հարցեր: Ի՞նչ կարող են առաջարկել Արևմուտքը կամ նրա դաշնակիցները ՀՀ-ին ռազմական, անվտանգության հարցերով։
Արարատ Միրզոյանի՝ ԱՄՆ այցը հաջող գնահատող ԱՄՆ-ում ՀՀ նախկին փոխդեսպան, իրավաբան Արմեն Խարազյանը Factor TV-ի հարցազրույցում այցի ամենացայտուն ձեռքբերումը միջուկային էներգիայի ոլորտում ստորագրված հռչակագիրն է համարում, որը նախատեսում է ՀՀ-ին ամերիկյան միջուկային էներգետիկ արտադրական հզորությունների տրամադրման հնարավորություն, և որով կողմերը մտադրություն են հայտնում աշխատել այդ ուղղությամբ։
«ԱՄՆ-ն ունի ավանդ Մեծամորի ատոմակայանի աշխատանքի երկարաձգման մեջ։ ԱՄՆ-ն աշխարհի 129 երկրի հետ ունի նմանատիպ համաձայնագիր, ի տարբերություն որոնց՝ ՀՀ-ի հետ ստորագրած համաձայնագիրը շահեկանորեն աչքի է ընկնում իր բովանդակայնությամբ, ներառյալ՝ մինչ արտադրական ճյուղերի զարգացումը»,- ասում է նախկին փոխդեսպանը։
Բացի այդ, վերջերս ՀՀ-ի առաջին արբանյակը տիեզերք բարձրացավ ոչ թե, օրինակ, ռուսական Ռոսկոսմոսի, այլ ամերիկյան SpaceX-ի միջոցով։ Նիկոլ Փաշինյանը շաբաթներ առաջ գագաթնաժողովում քննադատել էր ՀԱՊԿ-ին՝ ադրբեջանական ներխուժումների, 44-օրյա պատերազմին պատշաճ չարձագանքելու համար։ Ու նաև վարչապետը հիշեցրել էր, որ ՀԱՊԿ-ի անդամները Բաքվին զենք էին վաճառում, որն օգտագործվեց ՀՀ-ի և հայ ժողովրդի դեմ, ինչը ևս խնդիր է։ SpaceX-ի միջոցով արբանյակի դուրսբերումը տիեզերք չի ենթադրում ամերիկյան պետական ներգրավում, բայց, ըստ Արմեն Խարազյանի, հոգեբանական մեծ խնդիր է լուծվել։
«Հայաստանը կրիտիկական առաջին քայլն է արել՝ 30 տարի ուշացած քայլը, բայց առաջին կրիտիկական քայլն է արել։ ՀՀ նախորդ 3-4 վարչակարգերն ունեցել են հնարավորություն՝ կառուցելու թե՛ ամերիկյան տեխնոլոգիաներով միջուկային կարողություններ, թե՛ արձակելու հայկական առաջին արբանյակը, բոլորն էլ ձախողվել են և մերժել այդ հնարավորությունները։ Այս վարչակազմի օրոք սա հաջողվել է։ Սա խոսում է նրա մասին, որ երբ կա ցանկություն, կարող է լինել արդյունք»,- նշում է Արմեն Խարազյանը։
Հարցազրույցն ամբողջությամբ՝ տեսանյութում։
Ռոբերտ Անանյան
