Ռուս լրագրողն աճուրդի կհանի Նոբելյան մեդալը՝ հօգուտ Ուկրաինայում պատերազմից տուժած երեխաների

Ռուսական «Նովայա գազետա» պարբերականի խմբագիր Դմիտրի Մուրատովը որոշել է աճուրդի հանել  Նոբելյան մեդալը, գրում է The New York Times-ը։

2021 թվականի հոկտեմբերին Խաղաղության Նոբելյան մրցանակը շահելուց հետո Մուրատովն ասել էր, որ կարծում է՝ այդ պատիվը պետք է տրվի մեկ այլ ռուսաստանցու՝ բանտարկված ընդդիմադիր գործիչ Ալեքսեյ Նավալնիին: Ավելի ուշ Դմիտրի Մուրատովը հայտարարել է, որ իր մրցանակը՝ շուրջ 500․000 դոլար, նվիրաբերելու է տարբեր բարեգործական նպատակների։

Նշենք, որ «Նովայա գազետա»-ի խմբագիրը մրցանակը կիսել է Ֆիլիպիններում գործող Rappler-ի լրագրող Մարիա Ռեսսայի հետ։

Հիմա Մուրատովը, որի ղեկավարած թերթի հրապարակումն այս տարվա մարտի վերջին կասեցվեց՝ պարզաբանմամբ, որ ռուսական օրենսդրությունն անհնար է դարձնում Ուկրաինայի պատերազմի անաչառ լուսաբանումը, հանձնում է 23 կարատանոց ոսկուց Նոբելյան մեդալը:

Մեդալը հունիսի 20-ին Նյու Յորքում կվաճառվի Heritage Auctions աճուրդի տան կողմից։ Ամբողջ հասույթը կտրամադրվի ՅՈՒՆԻՍԵՖ-ին՝ Ուկրաինայից փախստական երեխաների օգնությանը։

Անցյալ ամիս Նյու Յորքում աճուրդի տան գրասենյակում տված հարցազրույցում Դմիտրի Մուրատովն ասել է, որ Նոբելյան մեդալի վաճառքն անվանել է «համերաշխության ակտ»՝ ռուսական ներխուժման հետևանքով տեղահանված 14 միլիոն ուկրաինացիների հետ։

«Եթե նայենք փախստականների թվին, ապա մենք ունենք Երրորդ համաշխարհային պատերազմ, ոչ թե տեղական հակամարտություն։ Սա սխալ էր, և մենք պետք է վերջ տանք դրան»,- ասել է նա՝ Ուկրաինայում կատարվողը «ողբերգություն» անվանելով։

Հրապարակումն ամբողջությամբ՝ սկզբնաղբյուր կայքում։