Ալեքսեյ Նավալնիի դեմ նոր քրեական գործ է հարուցվել

Ռուս ընդդիմադիր քաղաքական գործիչ Ալեքսեյ Նավալնին հայտնել է, որ իրեն մեղադրանք է առաջադրվել ևս մեկ քրեական գործով, այս անգամ՝ «ծայրահեղական համայնք» ստեղծելու համար։

«Անգամ 8 օր չի անցել, ինչ ուժի մեջ է մտել դատավճիռը, ըստ որի՝ ինձ տվել են 9 տարվա ազատազրկում խիստ ռեժիմի գաղութում, և այսօր քննիչը նորից ցատկոտեց և պաշտոնապես նոր գործով մեղադրանք առաջադրեց։ Պարզվում է, որ ես ծայրահեղական խումբ եմ ստեղծել՝ պաշտոնյաների և օլիգարխների նկատմամբ ատելություն սերմանելու համար։ Իսկ երբ ինձ բանտ նստեցրին, ես համարձակվեցի դրանից դժգոհել (իսկապես, դա ես էի) և հանրահավաքների կոչ արեցի»,- ասել է ընդդիմադիր գործիչը Twitter-ում հրապարակված հաղորդագրության մեջ։

Հիշեցնենք՝ սեպտեմբերի 28-ին հայտնի դարձավ, որ Ռուսաստանի Քննչական կոմիտեն գործ է հարուցել Նավալնիի և նրա երկու համախոհների՝ Լեոնիդ Վոլկովի և Իվան Ժդանովի դեմ՝ «ծայրահեղական համայնք ստեղծելու փաստով»։ Նավալնիի մի քանի այլ կողմնակիցներ կասկածվում են ծայրահեղական համայնքին մասնակից լինելու մեջ, ասվում է Քննչական կոմիտեի հաղորդագրության մեջ։

Մեկ շաբաթ առաջ Մոսկվայի քաղաքային դատարանը մերժել էր Նավալնիի բողոքը՝ իր կազմակերպության համար նվիրատվություններ հավաքելու ժամանակ խարդախության և դատարանի նկատմամբ անհարգալից վերաբերմունքի գործով։ Սա նշանակում է, որ Նավալնին պետք է տեղափոխվի խիստ ռեժիմի գաղութ, որտեղ նա 9 տարվա պատիժ կկրի։

2021 թվականի հունվարին Նավալնին Գերմանիայից վերադարձել է Ռուսաստան, որտեղ բուժում է ստացել «Նովիչոկով» թունավորվելուց հետո։ Նրան կալանավորել են օդանավակայանում և, դատարանի որոշմամբ, ուղարկել Պոկրովի թիվ 2 ուղղիչ գաղութ՝ Իվ Ռոշեի գործով պատիժ կրելու համար։

2021 թվականի ամռանը դատարանը ծայրահեղական է ճանաչել և արգելել նրա հիմնադրած Հակակոռուպցիոն հիմնադրամը (FBK) և քաղաքական գործչի շտաբը մարզերում։