ՆԱՏՕ-ի նախկին գլխավոր քարտուղարը խոսել է Շվեդիայի ու Ֆինլանդիայի անդամակցության հարցով Թուրքիայի դիրքորոշումից

ՆԱՏՕ-ի նախկին գլխավոր քարտուղար  Յաապ դե Հուպ Սխեֆերը Politico-ի հետ զրույցում խոսել է դաշինքին Շվեդիայի ու Ֆինլանդիայի անդամակցության վերաբերյալ Թուրքիայի բացասական դիրքորոշման մասին։

Լրատվամիջոցը գրում է, որ Ֆինլանդիայի և Շվեդիայի դիմումներն  Էրդողանին ևս մեկ հնարավորություն են տալիս օգտագործելու ՆԱՏՕ-ի կոնսենսուսի վրա հիմնված մոդելը, ինչպես նաև հավաքել իր բազան հաջորդ տարի նախատեսված ընտրություններից առաջ։ Սխեֆերը նշում է, որ Թուրքիայի մանևրների հետևում գործոնների համակցություն կարող է լինել։

Առաջինը՝ նրա խոսքով, ներքաղաքական խնդիրն է։ Էրդողանը միշտ  կոշտ է խոսել ահաբեկչության մասին և այդ համատեքստում պայքարել Քրդստանի աշխատավորական կուսակցության դեմ։  «Դու միշտ կարող ես համախմբել բնակչության մեծ հատվածներին՝ կապելով ահաբեկչությունը PKK-ի հետ», – ասել է նախկին գլխավոր քարտուղարը:

Նրա կարծիքով երկրորդն էլ այն է, որ  Ֆինլանդիայի և Շվեդիայի միանալը «կփոխի ՆԱՏՕ-ի ներսում հավասարակշռությունը, քանի որ դաշինքին միանում են երկու լիարժեք և լավ զինված» դեմոկրատիաներ:

Սպասվում է, որ Ֆինլանդիան ու Շվեդիան երկուսն էլ զգալիորեն կավելացնեն ՆԱՏՕ-ի պաշտպանական հնարավորությունները: Ֆինլանդիան կարող է առաջարկել Բալթիկ ծովում ռազմածովային հզորություն ու ներկայություն Արկտիկայում, որտեղ Ռուսաստանը  հետաքրքրություն է ցուցաբերում ազդեցության ընդլայնման առումով։ Շվեդիան էլ կարող պարծենալ առաջադեմ օդուժով։

Մեկ այլ կարևոր տարր է Թուրքիայի և ԱՄՆ-ի միջև լարվածությունը կործանիչների գնման պատճառով:

«Այդ գինը կարող է լինել այն, որ ամերիկացիները հանեն իրենց արգելափակումը F-16 կործանիչների վրայից», – ասել է Սխեֆերը:

ԱՄՆ-ը կարծես թե հակված է վճարելու այդ գինը, քանի որ  Պետդեպարտամենտը նախապես աջակցել է Թուրքիայի խնդրանքին, որն այժմ քննարկվում է Սպիտակ տան և Կոնգրեսի կողմից։

Հիշեցնենք, որ Թուրքիայի նախագահ Ռեջեփ Թայիփ Էրդողանը պարբերաբար հայտարարում է, որ Անկարան դեմ է Շվեդիայի ու Ֆինլանդիայի ՆԱՏՕ-ին անդամակցությանը՝մեղադրելով այդ երկրներին ահաբեկչությանն աջակցելու մեջ։

Էմմա Չոբանյան