Ինչո՞ւ է Ուկրաինայում երկարատև ռազմական դրություն մտցվել․ Զելենսկիի ներկայացուցիչը պարզաբանել է

Ուկրաինայում ռազմական դրությունը կերկարաձգվի միանգամից երեք ամսով, քանի որ հակահարձակումն ավելի շատ ժամանակ է պահանջում, քան պաշտպանությունը։ Այս մասին հայտարարել է Ուկրաինայի Սահմանադրական դատարանում նախագահի ներկայացուցիչ Ֆյոդոր Վենիսլավսկին, գրում է Korrespondent-ը։

«Փետրվարի 24-ից մենք արդեն երկու անգամ երկարացրել ենք ռազմական դրությունը։ Հիմա հասկանում ենք, որ հակառակորդը կենտրոնացել է ժամանակավոր վերահսկվող տարածքներում ամրություններ կառուցելու ուղղությամբ։ Հակահարձակման անցնելն ավելի բարդ խնդիր է, քան պաշտպանությունը։ Ուստի մենք պետք է գիտակցենք, որ դժվար թե կարողանանք առաջիկա մեկ ամսվա ընթացքում ազատագրել Ուկրաինայի ողջ տարածքը»,- ասել է նա։

Վենիսլավսկու խոսքով՝ եթե Ուկրաինան ազատագրվի երեք ամսից էլ քիչ ժամանակում, Ռադան կչեղարկի ռազմական դրությունը։ ՍԴ-ում նախագահի ներկայացուցիչն ընդգծել է, որ նման որոշման մեջ կա նաև իրավական բաղադրիչ. Երբ նախագահը մտցնի ռազմական դրության իրավական ռեժիմը, և խորհրդարանը հաստատի, Ուկրաինան պետք է ՄԱԿ-ին տեղեկացնի սահմանադրական իրավունքների և ազատությունների սահմանափակումների մասին, որոնք սահմանվում են ռազմական դրության պայմաններում։

Հիշեցնենք, որ Ուկրաինայում ռազմական դրությունը նախատեսվում է երկարացնել 90 օրով։

Նախագահական գրասենյակի ղեկավարի խորհրդական Ալեքսեյ Արեստովիչն արդարացի է համարում նախագահ Վլադիմիր Զելենսկու՝ ռազմական դրությունը երկարաձգելու առաջարկը, քանի որ դժվար թե ընթացիկ պատերազմն ավարտվի մինչև ամառվա վերջ։

Տաթև Ֆռանգյան