Ադրբեջանում հերթական ընդդիմադիր լրագրողն է հարձակման ենթարկվել․ դանակով փորձել են կտրել նրա կոկորդը

Ադրբեջանում հերթական ընդիմադիր լրագրողն է հարձակման ենթարկվել։ Տեղական լրատվամիջոցները հայտնում են, որ մարդու իրավունքների թեմաների լուսաբանմամբ հայտնի լրագրող Այթեն Մամեդովան մայիսի 8-ին կեսգիշերին մոտ իր տան մուտքի մոտ հարձակման է ենթարկվել։

Լրագրողը պատմել է, որ երբ տուն է վերադարձել, իր հետևից վերելակ է մտել միջին տարիքի անծանոթ տղամարդ։ Նա դանակը դրել է Մամեդովայի կոկորդին, սպառնալիքներ հնչեցրել մի դատական գործի վերաբերյալ ու պահանջել չլուսաբանել այն։

«Երբ վերելակի դուռը փակվեց, նա մի ձեռքով բռնեց ծնոտս, իսկ մյուսով դանակը դրեց կոկորդիս։ Դանակը կտրեց, կոկորդիս մնացել է կտրվածքը։ Եվ նա ինձ ասաց՝ խելքի չես եկել, հետո սկսեց վիրավորանքներ ու սպառնալիքներ հնչեցնել իմ մանկահասակ դստեր հասցեին։ Երբ վերելակը հասավ իմ հարկ, նա ինձ բաց թողեց ու հետ գնաց»,- պատմել է Մամեդովան։

Նա հավելել է, որ իր ամուսինը փորձել է հետապնդել հարձակվողին, սակայն նա հասցրել է փախչել։

Լրագրողը կարծում է, որ հարձակումը կապված է իր մասնագիտական ​​գործունեության հետ։ Մամեդովան ենթադրում է, որ դա կարող է կապված լինել Թովուզում երիտասարդ աղջկա սպանության դատական ​​գործի հետ։ Նրա խոսքով՝ 20 օր առաջ այդ գործի հետ կապված նաև զանգ է ստացել։ Այթեն Մամեդովան այն լրագրողներից է, որն ակտիվորեն լուսաբանում է այս գործով մեղադրյալ Իլքին Սուլեյմանովի դատավարությունը։ Դատաքննության ընթացքում բացահայտվել են բազմաթիվ փաստեր, որոնք հիմք են տալիս պնդելու Սուլեյմանովի անմեղությունը և քրեական գործի կեղծումը։

Մամեդովան կարծում է, որ «կան ուժեր, որոնք չեն ցանկանում բացահայտել ճշմարտությունն այս գործում»։

Նշենք, որ Մամեդովան երկար տարիներ ընդդիմադիր «Ազադլիք»-ի թղթակիցն է եղել։ Թերթի գործունեության դադարեցումից և առցանց տարբերակի արգելափակումից հետո նա տարբեր լրատվամիջոցների հետ է համագործակցում։

Հավելենք, որ վերջին շրջանում Ադրբեջանում կտրուկ աճել են ընդդիմադիր և անկախ լրագրողների ու իրավապաշտպաների վրա հարձակումների և նրանց հասցեին սպառնալիքների դեպքերը, որոնք նույնիսկ մտահոգել են ԵԽԽՎ պատգամավորներին։ Օրերս ԵԽԽՎ մի խումբ պատգամավորներ հանդես էին եկել Վեհաժողովի կողմից Ադրբեջանում լրագրողների և իրավապաշտպանների կյանքին ու անվտանգությանը սպառնացող վտանգների վերաբերյալ բանաձև ընդունելու նախաձեռնությամբ։

Նախագծի հեղինակները նշում էին, որ ԵԽԽՎ-ն պետք է ուշադրությամբ դիտարկի և ուսումնասիրի սպանությունների ու հարձակումների դեպքերը, որոնք սպառնում են ադրբեջանցի լրագրողների, բլոգերների և իրավապաշտպանների կյանքին ու ազատությանը, և պատրաստել համապարփակ զեկույց այդ խնդրի վերաբերյալ:

Էմմա Չոբանյան