Սերժ Սարգսյանի, Քոչարյանի շահն է շարժումից՝ վերջում ասել՝ արեցինք ամեն ինչ, ժողովուրդը չաջակցեց․ Անդրիաս Ղուկասյան․ ՏԵՍԱՆՅՈՒԹ

Ո՞րն է փողոցային ընդդիմադիր շարժման նպատակը․ քաղաքագետ Անդրիաս Ղուկասյանը Factor TV-ի հարցազրույցում պնդում է, որ խաղաղ պայքարի խնդիրը ոչ թե 100 հազարավոր մարդկանց փողոց դուրս բերելը պիտի լինի, այլ ուժերի կառավարումն ու կենտրոնացումը, ոչ թե այն՝ մե՞ծ է հանրահավաքը, թե՞ փոքր։

«Այստեղ Ռոբերտ Քոչարյանի և Սերժ Սարգսյանի շահը, ինչպես ես եմ տեսնում, այն է, որ իրենք դուրս կգան և՛ Արցախում, և՛ Հայաստանում իրենց հայրենակիցներին, հարազատներին, բարեկամներին, ընկերներին կասեն՝ «մենք արեցինք ամեն ինչ, ժողովուրդ, դու չաջակցեցիր, դրա համար այսպիսի ավարտ ունեցավ»։ Այս ամբողջը շատ վտանգավոր է հանրության համար»,- նշում է քաղաքագետ Անդրիաս Ղուկասյանը։

Լուծումն արդյո՞ք այն չէր լինի, որ ՀՀ նախկին նախագահները քաղաքական ընդդիմադիր դաշտը թողնեին հանրության աչքում իրենցից վստահելի ուժերին, որոնք հանդես են գալիս ժողովրդավարության պաշտպանության դիրքերից, Ղարաբաղի կարգավորման հարցով կոնկրետ ծրագիր ունեն և, գուցե, հասարակությունն էլ անհրաժեշտ չափով փողոց դուրս գար այդ դեպքում։

«Միգուցե, դա այդքան էլ պրագմատիզմի դաշտից չէ։ Բայց մարդիկ պետք է հասկանան, որ դա իրենց համար հանգիստ չի անցնի․ բացահայտվելու է բոլորի՝ և՛ Ռոբերտ Քոչարյանի, և՛ Սերժ Սարգսյանի, և՛ Նիկոլ Փաշինյանի ոչ բարոյական պահվածքը, եթե իրենք տանեն, այդ շարժումը զրո դարձնեն, հողի հետ հավասարեցնեն, միայն նրա համար, որ հետո ասեն՝ իրենք արել են ամեն ինչ, բայց ժողովուրդը չմիացավ։ Դա այդպես չի ստացվելու, բացահայտվելու է հատ-հատ»,- ասում է քաղաքագետը։

Հարցազրույցն ամբողջությամբ՝ տեսանյութում։

Ռոբերտ Անանյան