Թուրքական պաշտպանական ոլորտի ընկերություններն ակտիվորեն պայմանագրեր են կնքում Ասիայում

Թուրքական պաշտպանական ոլորտի կապալառուներն օգտվում են Ասիայում զենքի և սպառազինության պահանջարկից, քանի որ երկրներն ավելացնում են ծախսերը և փնտրում արևմտյան զենքի ավելի էժան այլընտրանքներ, գրում է Nikkei լրատվական կայքը:

Նշվում է, որ Turkish Aerospace-ը իտալացի գործընկեր Leonardo S.p.A.-ի հետ միասին մշակել է T-129 ATAK ուղղաթիռը։ Ֆիլիպինները 200 միլիոն դոլար արժողությամբ օդանավերից երկուսը ստացել է, որոնք արտադրվում են Թուրքիայում։

Լրատվամիջոցը գրում է, որ ողղաթիռների հանձնման արարողությանը մասնակցել է Թուրքիայի պաշտպանական գործակալության ղեկավար Իսմայիլ Դեմիրը, որն անմիջականորեն հաշվետու է նախագահ Ռեջեփ Թայիփ Էրդողանին։ Դեմիրը խոստացել է համագործակցել երկրի հետ՝ նպաստելու սարքավորումների, վերապատրաստման և տեղական կարողությունների զարգացմանը։

Ասիա-խաղաղօվկիանոսյան տարածաշրջանի երկրներն ավելացնում են պաշտպանական ծախսերը նույնիսկ COVID-19 համաճարակի պայմաններում: Անցյալ տարի Ճապոնիայում ծախսերն աճել են 7,3 տոկոսով, Սինգապուրում՝ 7,1, Հարավային Կորեայում՝ 4,7 և Ավստրալիայում՝ 4 տոկոսով։

Լրատվամիջոցը գրում է, որ Ուկրաինայում թուրքական հարձակողական անօդաչու թռչող սարքերի հաջողությունը հետաքրքրություն է առաջացրել թուրքական արտադրանքի նկատմամբ: Ֆիլիպինները, մասնավորապես, T129-ները գնել է դրանց գնի, արդյունավետության և ամրության համար։ Այս մասին մարտին Թուրքիա կատարած այցի ժամանակ Nikkei-ին ասել է այդ երկրի պաշտպանության փոխնախարար Կարդոզո Լունան: Նա նշել է, որ իր երկիրը կարող է հետաքրքրված լինել նաև փոքր սուզանավերով և ծովային պարեկային նավերով:

Թուրքական պետական ASFAT-ն ընդգրկվել է Ֆիլիպիններին պարեկային նավակներ մատակարարելու կարճ ցուցակում՝ գրեթե 600 միլիոն դոլար արժողությամբ, այն բանից հետո, երբ Մանիլան բախվել է ավստրալիական մատակարարի հետ գնային անհամաձայնությանը:

Էմմա Չոբանյան