«Մենք չենք գիտակցել և ձախողել ենք ժողովրդավարության մեր քննությունը». ապոլիտիկ զրույց Րաֆֆի Հովհաննիսյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Ժառանգություն» կուսակցության համահիմնադիր Րաֆֆի Հովհաննիսյանը: Նրա կարծիքով՝ Հայաստանի ներկայիս պետականության հիմքում դրված Անկախության հռչակագրի կետերն անբեկանելի են: Եթե դրանք չեղարկվեն, դա կնշանակի Երրորդ Հանրապետության վերջը:

Ինչ վերաբերում է 1991 թվականի սեպտեմբերի 21-ին հանրաքվեի դրված հարցին, ապա հաղորդման հյուրը վստահ է, որ Հայաստանի բնակչության ճնշող մեծամասնությունն իսկապես ուզում էր ունենալ անկախ, ժողովրդավարական պետություն: Այլ հարց է, որ 30 տարվա ընթացքում չի հաջողվել նման պետություն կառուցել:

Զրույցի ընթացքում անդրադարձ եղավ պատմության մեջ անհատի դերին: Արդյո՞ք դա է վճռորոշ, թե՞ պատմական օրինաչափությունները: «Ժառանգություն» կուսակցության համահիմնադիրը կարևորում է երկուսն էլ, սակայն վերապահում է անում այն առումով, որ օրինաչափությունների անհարկի շահարկումը կարող է բերել ճակատագրապաշտության:

Անդրադառնալով վերջին երկու տարիների իրադարձություններին՝ Րաֆֆի Հովհաննիսյանը նշում է. «Պատերազմը, պարտությունը, հողի հանձնումը ես չեմ համարում անխուսափելի և օրինաչափ»:

Ժամանակակից պետության արդյունավետ ինստիտուտներ ստեղծելու հարցում հաղորդման հյուրը կարևորում է և՛ ճշգրիտ ձևակերպված օրենքի պահանջները, և՛ ավանդույթները, որոնց ձևավորման համար մի քանի ընտրական շրջափուլ է անհրաժեշտ: 21-րդ դարում հայկական պետականությունը պահպանելու հեռանկարների վերաբերյալ Րաֆֆի Հովհաննիսյանը վստահ է, որ ՄԱԿ-ի անդամ պետությունը չի կարող վերանալ: Աղետալի սցենարը կարող է իրագործվել միայն այն դեպքում, եթե ծավալվի Երրորդ համաշխարհային պատերազմ և հիմնովին փոխվի աշխարհակարգը:

Մանրամասները՝ տեսանյութում: