Արևմուտք-Ռուսաստան հակասությունները կարող են աշխատել և՛ մեր դեմ, և՛ մեր օգտին․ Տարոն Հովհաննիսյան․ ՏԵՍԱՆՅՈՒԹ

«Դեռևս երկար ժամանակ չենք տեսնի Մինսկի խմբի համանախագահ երկրների՝ նախկինի պես աշխատանք, որովհետև իրավիճակը փոխվել է հատկապես փետրվարի 24-ից հետո»,- «Օրբելի» տեղեկատվական-վերլուծական կենտրոնի փորձագետ Տարոն Հովհաննիսյանն այս կարծիքը հայտնեց ապրիլի 19-ին Մոսկվայում ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի հանդիպման արդյունքներով ընդունված համատեղ հայտարարության վերաբերյալ քննարկման ժամանակ:

Հովհաննիսյանի դիտարկմամբ՝ Արևմուտք – Ռուսաստան հակասությունները կարող են աշխատել և՛ Հայաստանի դեմ, և՛ հօգուտ Հայաստանի՝ կախված նրանից, թե ինչ քաղաքականություն է վարում Հայաստանը:

«Ադրբեջանը ցանկություն ունի պարտադրելու իրեն ձեռնտու լուծում, քանի դեռ Հայաստանը, Արցախը թույլ են պատերազմում պարտություն կրելու պատճառով, և քանի դեռ ԵԱՀԿ համանախագահ երկրները զբաղված են այլ հարցերով և իրար հետ դժվար են լեզու գտնում:

Չկա մի այնպիսի տարբերակ, որ կարող է ստորագրվել մի փաստաթուղթ և դրանով ԼՂ հակամարտությունը միանգամից լուծում ստանա: Դա չի կարող լինել, քանի դեռ կոնֆլիկտի բոլոր կողմերը չունեն կանխատրամադրվածություն: Ադրբեջանը հակառակը՝ տրամադրված է անընդհատ ագրեսիայի դիմելու: Հետպատերազմյան այս «տաք» իրավիճակում թեկուզ 10 տոկոսով ՀՀ-ին և Արցախին ձեռնտու փաստաթուղթ ստորագրելու հավանականությունը ցածր է»,- նշեց Հովհաննիսյանը:

Փորձագետի դիտարկմամբ՝ Ռուսաստանը և Արևմուտքը փորձելու են հանդես գալ տարբեր առաջարկներով, ինչը հայկական կողմին կարող է մանևրելու հնարավորություն տալ և ժամանակ՝ խնդիրներոը լուծելու համար. «Եթե ճիշտ վարվենք, ժամանակը կարող է աշխատել մեր օգտին և հնարավորություն տալ՝ բանակցել ավելի ամուր դիրքերից»:

Մանրամասները՝ տեսանյութում: