Գնաճի սահուն վայէջք իրականացնելն աշխարհում շատ է դժվարացել

Ուկրաինայում Ռուսաստանի պատերազմը և Մոսկվայի դեմ արևմտյան պատժամիջոցները խաթարեցին համաշխարհային առևտուրը, բարձրացրեցին նավթի գները, սպառնացին սննդի մատակարարմանը և մեծացրին անորոշությունը, երբ աշխարհը դեռեւս պայքարում է համավարակից հետո վերականգնվելու համար:

«Ամերիկայի ձայն»-ը գրում է, որ ԱՄՀ-ի գլխավոր տնտեսագետ Պիեռ-Օլիվյե Գուրինչասի խոսքերով. «Նույնիսկ պատերազմից առաջ գնաճը շատ երկրներում աճում էր մատակարարումների եւ պահանջարկի միջեւ անհավասարկշռության եւ համավարակի ընթացքում տնտեսությանն աջակցելու քաղաքականության պատճառով, ինչը ստիպեց իրականացնել դրամավարկային քաղաքականության խստացումներ»:

ԱՄՀ-ն կրճատել է համաշխարհային աճի կանխատեսումը 4,4-ից մինչև 3,6 տոկոս; Համաշխարհային բանկը՝ 4,1 -ից մինչև 3,2 տոկոս։

Էներգիայի և ապրանքների գների բարձրացումը հանգեցրել է արտադրանքի նվազման և ավելի մեծ գնաճի: Սպիտակ տունն այս ամենի մեջ մեղադրում է Մոսկվային:

Ինչպես Սպիտակ տան մամուլի քարտուղար Ջեն Սաքին է նշում, «Մենք դեռ վաղուց ենք ասել, որ Ռուսաստանի ներխուժումն Ուկրաինա շարունակական ազդեցություն կունենա համաշխարհային տնտեսության վրա՝ լինի նավթի շուկաների, թե այլ ոլորտներում»:

Դրան ավելացնենք, որ չինական տնտեսության դանդաղումը պայմանավորված է կորոնավիրուսի օմիկրոն ենթատեսակի պատճառով ուժի մեջ մտած արգելափակումներով:

Դիանա Ֆուրխտգոթը, որը Ռոթ Ջորջ Վաշինգտոնի համալսարանի տնտեսագիտության դոկտոր է, Skype-ի միջոցով ասել է.

«Նախ, Չինաստանը մեկշաբաթյա կարանտին է սահմանել այն ապրանքների համար, որոնք Չինաստան են մուտք գործում այլ երկրներից, ինչը նշանակում է, որ արտադրողները, որոնք օգտագործում են չիպեր այլ վայրերից, ինչպիսիք են Հարավային Կորեան, չեն ստանում անհրաժեշտ միջոցներ Չինաստանում ապրանքներ պատրաստելու համար: Երկրորդ, նավահանգիստներում, ինչպես օրինակ Հոնկոնգում եւ Շանհայում խցանումներ կան արգելափակման պատճառով»:

Վաշինգտոնում ԱՄՀ-ի և Համաշխարհային բանկի գարնանային հանդիպումներին ներկա բանկիրների հիմնական նպատակը գնաճը զսպելն է՝ առանց աշխարհը տնտեսական հապաղման մեջ գցելու, այլ տոկոսադրույքները համակարգված եղանակով աստիճանաբար բարձրացնելով:

Ինչպես «Սկայպ»-ի միջոցով Ամերիկյան ձեռնարկությունների ինստիտուտի ավագ գիտաշխատող և ԱՄՀ-ի քաղաքականության մշակման և վերանայման բաժնի նախկին փոխտնօրեն Դեզմոնդ Լախմանն է ասում. «Դա կկանխի մի տեղից մյուսը գնաճի տեղափոխումը: Բայց դա նուրբ խնդիր է, քանի որ ունենք բաժնետոմսերի շատ աշխույժ շուկաներ, ունենք բնակարանային աշխույժ շուկաներ,: Այնպես որ, դյուրին չի լինելու տոկոսադրույքները բարձրացնելն այնպես, որ նվազի գնաճն առանց տնտեսական հապաղում առաջ բերելու»: