Նախարարի պաշտոնակատար Սուրեն Կարայանը ծանոթացել է արտադրական ձեռնարկությունների ծրագրերին

ՀՀ տնտեսական զարգացման և ներդրումների նախարարի պաշտոնակատար Սուրեն Կարայանն այսօր այցելել է արտադրական ձեռնարկություններ՝ ծանոթանալու վերջիններիս ծրագրերին։

 Նախարարի պաշտոնակատարն այցելել է Հայաստանում մսամթերքի արտադրությամբ զբաղվող «Նաթֆուդ» ընկերության արտադրամաս։ Սուրեն Կարայանը շրջայց է կատարել գործարանում, ծանոթացել արտադրական հզորություններին և արտադրամասի զարգացման հնարավորություններին։ Նախարարի պաշտոնակատարին  տեղեկացրել են, որ ընկերությունը մտադիր է այս տարի ընդլայնել իր բիզնես ծրագրերը։

«Նաթֆուդի» տնօրենների խորհրի նախագահ Հենրիկ Զախարյանը նշել է, որ  ընկերությունը զինված է գերմանական տեխնոլոգիայով, և որակի վերահսկում իրականացվում է արտադրական բոլոր գործընթացներում․ ընկերությունում ներդրված են որակի վերահսկման անհրաժեշտ համակարգերը։ Նշվել է նաև, որ  «Բիելլա» ապրանքանիշը ներկայացնող ընկերության արտադրանքի ծավալն աճել է 40.8%-ով։

Ընկերության արտահանման բաժնի ղեկավար Անի Թահմիզյանը տեղեկացրել է, որ արտադրանքի արտահանումը նախորդ տարվա համեմատ աճել է 4 անգամ, բացի այդ, արտահանման ուղղություններ են բացվել դեպի Միջին Ասիայի երկրներ։ Այդ երկրների թվում է նաև Ուզբեկստանը, որտեղ Հայաստանը առաջինն է մսամթերք արտահանել։

Տնտեսական զարգացման և ներդրումների նախարարի պաշտոնակատար Սուրեն Կարայանը այցելել է նաև «Ռուսալ Արմենալ» ընկերություն։ Փայլաթիթեղ արտադրող ընկերության ղեկավարության հետ քննարկվել են արտադրանքի արտահանման հետ կապված խնդիրները, դրանց լուծման հնարավոր ուղիները, ինչպես նաև ընկերության զարգացման ծրագրերը։

Սուրեն Կարայանն այցելել է նաև կոշիկի արտադրությամբ զբաղվող «Փիրալյան» ՍՊԸ։

Roberto Piraloff ապրանքանիշը ներկայացնող ընկերության հիմնադիր Գևորգ Իորդանյանը նշել է, որ գործարանը համալրված է արտադրության այս ոլորտում ամենաժամանակակից տեխնոլոգիաներով, որոնք համապատասխանում են միջազգային ES ստանդարտներին:  Արտահանման հիմնական ուղղությունը Չեխիան է։

Նախարարի պաշտոնակատար Սուրեն Կարայանի հետ քննարկվել են արտադրանքի ծավալների ավելացման հնարավարությունները, արտահանման ընդլայման հեռանկարները և առաջիկա ծրագրերը, այդ թվում՝ կանացի կոշիկի արտադրության կազմակերպումը։