07.10.2026 | 23:48
Արթուր Դանիելյանը կալանավորվեց
Հայաստանն ավտորիտար ռեժիմից անցել է հիբրիդային կառավարման ռեժիմի․ «Freedom House»-ի նոր զեկույցը
Քաղաքականություն
20.04.2022 | 15:29
«Freedom House»-ը հրապարակել է «Nations in Transit 2022» տարեկան զեկույցը, որում անդրադարձ կա նաև Հայաստանին։
Զեկույցում նշվում է, որ այս տարի, 21-րդ դարում առաջին անգամ, «Nations in Transit 2022» եվրոպական տարածաշրջանի մի շարք երկրներում կառավարման ձևը հիբրիդային ռեժիմն է դարձել: Չորս ժողովրդավարական երկրներ՝ Հունգարիան, Չեռնոգորիան, Հյուսիսային Մակեդոնիան և Սերբիան այս գորշ գոտում հայտնվել էին 2004 թվականից ի վեր, երբ սկսվեց ժողովրդավարական անկման շրջանը: Ըստ զեկույցի՝ «նույն ժամանակահատվածում երեք ավտորիտար ռեժիմներ կատարեցին ժողովրդավարական քայլեր և համալրեցին հիբրիդային ռեժիմների շարքերը՝ Մոլդովան, Կոսովոն, այժմ՝ նաև Հայաստանը»։ Այն երկրները, որոնք ավտորիտար կառավարումից անցել են հիբրիդայինի, մի փոքր ավելի խոստումնալից պատկեր ունեն, թեև դեռևս չեն համապատասխանում ժողովրդավարական չափանիշներին:
«Հայաստանում, օրինակ, 2018-ին քաղաքացիներն օգտվել են բողոքի ալիքից և մի շարք մրցակցային ընտրություններ են անցկացվել, որոնցից վերջինը՝ 2021 թվականինը, վճռականորեն վերջ է դրել «Հանրապետական կուսակցության» բազմամյա կառավարմանը։ Գործող պաշտոնատար անձինք փոխարինվեցին քաղաքական գործիչների նոր սերնդով, որոնք, չնայած նկատելի թերություններին, պահպանում են հավատարմությունը ժողովրդավարությանը և հանրային շահերին: Ժողովրդավարական կառավարման ջատագովները ուժ են ստանում քաղաքական գործիչների նոր սերնդից»,- մասնավորապես, ասվում է զեկույցում: Փաստաթղթում նշված է, որ Հայաստանում քաղաքացիական հասարակության տեղական խմբերը կարողացել են կանխել իշխող կուսակցության կողմից օրինագծի ընդունումը, որը Մարդու իրավունքների պաշտպանի գրասենյակը կդներ ավելի մեծ վերահսկողության ներքո:
Զեկույցում անդրադարձ կա նաև Ադրբեջանին և նրա կողմից ԼՂ-ում սանձազերծված պատերազմին։ Նշվում է, որ Իլհամ Ալիևն Ադրբեջանի նախագահի պաշտոնում հորը փոխարինեց 2003 թվականին, և այդ պահից սկսած երկիրն ավելի մեծ հետընթաց է ունեցել, քանի որ ռեժիմը սկսեց ոչնչացնել ընդդիմադիր կուսակցությունները, անկախ լրատվամիջոցները և հետապնդել քաղաքացիական ակտիվիստներին: Ըստ զեկույցի՝ «2020 թվականին Ալիևը ռազմական հարձակում սկսեց հայկական ուժերի դեմ Լեռնային Ղարաբաղի վիճելի տարածքում՝ սպանելով հազարավոր մարդկանց և շատերին տեղահանելով։ Հակամարտությունը, որը լրջորեն ապակայունացրեց տարածաշրջանի անվտանգային իրավիճակը, Բաքվին նոր տարածքներ բերեց, ամրապնդեց Ալիևի քաղաքական դիրքերը և հիմքեր ստեղծեց ազատ արտահայտվելու իրավունքի հետագա ճնշման համար: Այս ռեպրեսիվ միջավայրում մշտական սոցիալական խնդիրները շարունակում են խորանալ»:
Տաթև Ֆռանգյան
