Դատարանը բավարարեց բռնության ենթարկված կնոջ բողոքը

Այսօր Երևան քաղաքի ընդհանուր իրավասության դատարանի դատավոր Արշակ Մաթևոսյանը բավարարեց բռնության ենթարկված Ս․Ա․-ի բողոքն ընդդեմ Մալաթիա-Սեբաստիա վարչական շրջանների դատախազ Դ․Վեքիլյանի կողմից բողոքը մերժելու մասին որոշման։ 

Factor.am-ը գրել էր, որ Ս․Ա․-ի դեմ արցունքաբեր գազ էր գործածել նրա նախկին ամուսին Մ․Զ․-ն։ ՀՀ Ոստիկանության Մալաթիայի բաժնում քրեական գործ չէին հարուցել։ Տուժող Ս․Ա․-ի փաստաբան, Հելսինկյան ասոցիացիա իրավապաշտպան հասարակական կազմակերպության ներկայացուցիչ Արա Ղարագոզյանը բողոքարկել էր քրեական գործ չհարուցելու մասին որոշումը նախ գործը վերահսկող դատախազին։ Վերջինս մերժել էր բողոքը և քրեական գործ չհարուցելու մասին որոշումը թողել էր ուժի մեջ։ Դրանից հետո փաստաբանը բողոք էր ներկայացրել դատարան, որն այսօր բավարարեց բողոքը՝ փաստացի հաստատելով փաստաբանի այն պնդումը, որ հետաքննիչը դեպքի առթիվ չի  իրականացրել արդյունավետ քննություն, որի արդյունքում պատասխանատվության չի ենթարկվել բռնարար տղամարդը:

Հետաքննիչ Միասյանը, առգրավվելով Մ․Զ․-ի կողմից գործադրված քիմիական նյութը,  այն չի ուղարկել փորձաքննության՝ պարզելու, թե արդյոք այդ նյութը ինչպիսի վնաս կարող է հասցնել մարդկանց  կյանքին և առողջությանը։ Սրա վերաբերյալ հետաքննիչ Մինասյանը դատարանում հայտարարել էր, թե նյութը չի ուղարկել փորձաքննության, որպեսզի «չվատնի պետական միջոցները»։ Դատարանը, սակայն, բավարար չհամարեց քննիչի բացատրությունը և այսօրվա իր որոշմամբ վերացրեց քրեական գործի հարուցումը մերժելու մասին  որոշումը։

Այսօր դատարան էր հրավիրվել նաև Ս․Ա․-ի նախկին ամուսինը։ Վերջինս չէր ներկայացել և դատական նիստերի քարտուղարին փոխանցել էր, որ չի պատրաստվում ներկայանալ դատարան, իսկ ինչ-որ իր մասին կասվի դատարանում, սուտ է։  

Նշենք, որ բռնության ենթարկված կինը Factor.am-ին պատմել էր, որ ոստիկանությունը մշտապես անլուրջ է վերաբերվել ընտանեկան բռնության վերաբերյալ իր ահազանգերին։ ««Նորից թուղթ պիտի սևացնենք, մեկ ա՝ գործ չեմ հարուցելու»,- ասում էր հետաքննիչը, իսկ մեկ այլ հետաքննիչ իմ շարունակական բողոքներին ի պատասխան ասաց՝ «Ճիշտ տղամարդ ընտրեիր․․․», կարծես ես էի մեղավոր, որ իմ դեմ բռնություն էր կիրառվում»,- պատմում է Ս․Ա․-ն։

Նա նաև պայքարում է անչափահաս որդու խնամակալությունը ստանձնելու համար։ Երեխան հոր մոտ է և նրան այցելելու գրեթե բոլոր փորձերը ուղեկցվում են վեճերով ու բռնությամբ։

Արման Ղարիբյան