«Հասարակության մեջ արդիականացման պահանջ չկա». ապոլիտիկ զրույց Տիգրան Ջրբաշյանի հետ. ՏԵՍԱՆՅՈՒԹ

Factor TV-ի «A-politic» հաղորդաշարի հյուրն է տնտեսագետ Տիգրան Ջրբաշյանը: Նա կարծում է, որ պետությունները, արդիականացում իրականացնելով, գնում են որոշակի ուղղությամբ, բայց նրանց անցնելիք ճանապարհները տարբեր են:

Անկախ Հայաստանում, տնտեսագետի մատուցմամբ, արդիականացում չի իրականացվել՝ որոշ չափով տեղի է ունեցել դրա իմիտացիան և ներկայիս իրավիճակի հետ կապված ձևավորվել են մի շարք «միֆեր»: Դրանք հիմնված են այն պատրանքի վրա, որ էքստենսիվ զարգացումը՝ դպրոցների, հիվանդանոցների կամ գիտական հրապարակումների քանակը կարող է արդիականացման հիմք դառնալ: Իրականում արդիականացում իրականացվում է, երբ կա դրա հասարակական պահանջարկը, ինչը, ըստ Տիգրան Ջրբաշյանի, մեր երկրում բացակայում է:

Պատմությունը ցույց է տալիս, որ առավել զարգացած երկրներից տեխնոլոգիաների, օրենսդրական կարգավորումների, ինստիտուտների ներմուծումն արագացնում և անգամ խթանում է արդիականացման գործընթացը՝ ժամանակ չի ծախսվում «հեծանիվ հորինելու» վրա: Այդպես է եղել Պետրոս Առաջինի Ռուսաստանում, Ճապոնիայում, Կորեայում, Սինգապուրում և այլուր:

Հայաստանը, հաղորդման հյուրի կարծիքով, 30 տարվա ընթացքում նման փոխառումներ չի արել, հակառակը՝ այս տասնամյակների ընթացքում հիմնականում տեղի է ունեցել տեխնոլոգիաների և ինստիտուտների դեգրադացիա: Սակայն տեխնոլոգիական հեղափոխության հերթական փուլերի սահմանագծում տնտեսագետը Հայաստանի համար հնարավորությունների որոշակի «պատուհան» է տեսնում:

Մանրամասները՝ տեսանյութում: