Հայաստանը ձեռնպահ է քվեարկել ՄԱԿ-ի Մարդու իրավունքների խորհրդի բանաձևին

Հայաստանը ձեռնպահ է քվեարկել ՄԱԿ-ի Մարդու իրավունքների խորհրդի կողմից միակողմանի պատժամիջոցների ընդունումը դատապարտող բանաձևին։

ՄԱԿ-ի Մարդու իրավունքների խորհուրդը (ՄԻԽ) Ժնևում իր 49-րդ նստաշրջանում կոչ է արել պետություններին դադարեցնել միակողմանի պատժամիջոցների ընդունումը՝ դատապարտելով դրանց օգտագործումը որպես քաղաքական և տնտեսական ճնշման միջոց։ 47 երկրներից 27-ը, այդ թվում՝ Ռուսաստանը, Չինաստանը և Հնդկաստանը, կողմ են քվեարկել հինգշաբթի նիստում հաստատված համապատասխան բանաձևին, իսկ 14 պետություն՝ ներառյալ ԱՄՆ-ը, ԵՄ երկրները, Մեծ Բրիտանիան և Ուկրաինան, դեմ են արտահայտվել։ Վեց պետություն, այդ թվում նաև Հայաստանը, Բրազիլիան և Մեքսիկան, ձեռնպահ են քվեարկել, գրում է ՏԱՍՍ-ը։

Բանաձևում ասվում է, որ խորհուրդը խստորեն դատապարտում է «որոշ ուժերի» կողմից պատժամիջոցների շարունակական միակողմանի կիրառումը որպես ճնշման միջոց, ներառյալ քաղաքական և տնտեսական, որպեսզի թույլ չտան երկրներին օգտվել «ազատ և անկախ որոշումներ կայացնելու իրավունքից»:

Խորհուրդը կոչ է անում բոլոր պետություններին դադարեցնել «միակողմանի հարկադրանքի միջոցների ընդունումը, պահպանումը կամ իրականացումը», որոնք հակասում են միջազգային իրավունքին և ՄԱԿ-ի կանոնադրությանը, այդ թվում՝ «արտտարածքային ազդեցություններով պատժամիջոցները, որոնք խոչընդոտներ են ստեղծում առևտրային հարաբերությունների համար»: Բանաձևում ասվում է, որ գործող միակողմանի պատժամիջոցները պետք է չեղարկվեն, քանի որ դրանք հակասում են ՄԱԿ-ի կանոնադրությանը։

Տաթև Ֆռանգյան