20.08.2026 | 23:01
«Նոան» նոր գլխավոր մարզիչ ունի
Թուրքիան կարող է դառնալ նոր հարթակ ռուս օլիգարխների համար, բայց դա Անկարայի համար ռիսկային ռազմավարություն է․ CNBC
Քաղաքականություն
31.03.2022 | 23:30
Ռուս օլիգարխների հարստությունը նոր տուն է փնտրում, և Թուրքիան իրեն արագորեն երաշխավորել է, որպես ցանկալի հյուընկալող, գրում է CNBC-ն։ Թուրքիայի արտաքին գործերի նախարար Մևլութ Չավուշօղլուն շաբաթ օրը CNBC-ին ասել է, որ ողջունում է պատժամիջոցների ենթարկված ռուս օլիգարխների մուտքը երկիր՝ որպես զբոսաշրջիկների և ներդրողների, քանի դեռ նրանց բիզնես գործարքները համապատասխանում են միջազգային իրավունքին: Սա հետևել էր նախագահ Էրդողանի նմանատիպ հայտարարությանը։
Մեկնաբանությունները ենթադրություններ են առաջացրել, որ Թուրքիան՝ ԵՄ անդամ չլինելով, բայց լինելով ՆԱՏՕ-ի անդամ երկիր, կարող է ակտիվորեն խրախուսել ներդրումները սև ցուցակում հայտնված միլիարդատերերի կողմից, քանի որ փորձում է զարգացնել ճգնաժամի մեջ գտնվող իր տնտեսությունը: Ըստ Reuters-ի՝ հարուստ ռուսներն ակտիվորեն ներդրումներ են փնտրում այնտեղ, սակայն ցանկացած հեռանկարային ձեռքբերում կարող է անհեռատես լինել մի երկրի համար, որը կազմակերպում է նուրբ բալանսավորող գործողություն Ռուսաստանի և Արևմուտքի միջև:
«Ռուսական փողեր ներգրավելը կարող է երկարաժամկետ վնաս հասցնել Թուրքիային», – CNBC-ին ասել է Թուրքիայում Ատլանտյան խորհրդի ավագ տնօրեն և Անկարայում ԱՄՆ դեսպանատան նախկին տնտեսագետ Դեֆնե Արսլանը:
Լրատվամիջոցը գրում է, որ Թուրքիան խստորեն քննադատում է Մոսկվայի ներխուժումը, սակայն չի կիրառում այնպիսի պատժամիջոցներ, ինչպիսիք են ԱՄՆ-ի, ԵՄ-ի, Մեծ Բրիտանիայի և մյուսների կողմից սահմանված պատժամիջոցները: Փոխարենը փորձում էլինել չեզոք միջնորդ։
Արևմտյան դաշնակիցները չեն ճնշել Թուրքիային՝ միանալու պատժամիջոցներին, ոչ էլ հավանաբար կպատժեն նրան դա չանելու համար: Սա Թուրքիային դարձրել է լեգիտիմ ֆորպոստ պատժամիջոցների ենթարկված ռուսներին պատկանող ակտիվների համար: Օտարերկրյա ներդրումների և ակտիվների ներհոսքը կարող է բարենպաստ լինել թուրքական տնտեսության համար, որն անցած սեպտեմբերին ընկավ ճգնաժամային ռեժիմի մեջ։
Էմմա Չոբանյան
