17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Ուկրաինան պահանջում է ՄԱԿ-ի հատուկ առաքելություն մտցնել Չեռնոբիլի ԱԷԿ
Քաղաքականություն
30.03.2022 | 14:14
Ուկրաինան ՄԱԿ-ի Անվտանգության խորհրդից պահանջում է անհապաղ միջոցներ ձեռնարկել՝ Չեռնոբիլի ատոմակայանի բացառման գոտին ապառազմականացնելու և այնտեղ ՄԱԿ-ի հատուկ առաքելություն մտցնելու համար։ Այս մասին Telegram-ում հրապարակված տեսաուղերձում հայտնել է Ուկրաինայի օկուպացված տարածքների վերաինտեգրման հարցերով փոխվարչապետ Իրինա Վերեշչուկը, գրում է Unian-ը։
Նա նշել է, որ երեկ Բելգորոդում Ռուսաստանի զինված ուժերի պահեստում զինամթերքի ինքնապայթում է գրանցվել։
«Սա տիպիկ օրինակ է այն բանի, թե ինչպես են ռուսներն անտեսում անվտանգության կանոններն ու զանգվածաբար օգտագործում են Երկրորդ համաշխարհային պատերազմից մնացած վտանգավոր սպառազինությունը։ Դեռ երեկ էր, որ Ուկրաինայի գլխավոր շտաբը նախազգուշացրել էր զինամթերքի ինքնապայթման վտանգի մասին, որի հսկայական պահեստ է ՌԴ-ն տեղակայել Չեռնոբիլի ԱԷԿ-ի մոտակայքում։ ՌԴ-ն պետք է անհապաղ դուրս բերի իր զորքերը Չեռնոբիլի գոտուց»,- ընդգծել է Վերեշչուկը։
Մինչ այդ, տեղեկացվում է, որ ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Մարիանո Գրոսսին ժամանել է Հարավ-Ուկրաինական ԱԷԿ։ Գործակալությունը տեխնիկական աջակցություն կտրամադրի միջուկային վթարները կանխելու համար։
«Ես ժամանել եմ Հարավ-ուկրաինական ԱԷԿ՝ հանդիպելու կառավարության ներկայացուցիչների և անձնակազմի հետ և սկսելու ՄԱԳԱՏԷ-ի կողմից տեխնիկական աջակցության տրամադրումը՝ երկրի միջուկային օբյեկտների անվտանգությունն ու պաշտպանությունն ապահովելու համար: Կարևոր է այս ծայրահեղ ծանր ժամանակներում տեղում լինել՝ Ուկրաինային արդյունավետ աջակցություն ցուցաբերելու համար»,- նշել է նա։
Տաթև Ֆռանգյան
