Հայաստանի հրաձգության ազգային հավաքականի անդամները և մարզիչն այսօր հրավիրված ասուլիսում ամփոփում են Եվրոպայի առաջնությունում գրանցված արդյունքները։
Նշենք, որ Հայաստանի հրաձգության ազգային հավաքականը վերադարձել է Նորվեգիայի Համար քաղաքից, որտեղ ընթանում էր գնդակային հրաձգության Եվրոպայի առաջնությունը: Առաջնությանը Հայաստանը ներկայացված էր 12 մարզիկներով։ Հայ հրաձիգներն ընդհանուր հաշվարկով նվաճել են 10 մեդալ` 7 ոսկի և 3 արծաթ:
«Արդյունքները սպասելի էին, մեր մարզիկները լավ պատրաստված էին»,- նշեց Հայաստանի հրաձգության ազգային հավաքականի մարզիչ Սեյրան Նիկողոսյանը:
Անդրադառնալով խնդիրներին՝ մարզիչը նշեց, որ հրաձիգներից շատերը հանդերձանք չունեն: Նրա խոսքով՝ 2014-ից պետական միջոցներով հանդերձանք և զենք-զինամթերք ձեռք չի բերվել:
«Ֆեդերացիայի նախագահը, Օլիմպիկան կոմիտեի նախագահն են միջոցներ տրամադրել, ինչ-որ բաներ ենք ձեռք բերել՝ փամփուշտ, զենք, հանդերձանք և այլն»,- նշեց մարզիչը՝ հավելելով, որ պետբյուջեից տարեկան 45 միլիոն դրամ է տրամադրվում, որը նախատեսված է միայն հավաքների ու միջոցառումների կազմակերպման համար:
Մանրամասները՝ տեսանյութում:
