Կրթության կառավարման համակարգում չունենք ռազմավարական ուղղությամբ մտածող մարդկային ռեսուրս․ փորձագետ․ ՏԵՍԱՆՅՈՒԹ

«Արդեն ունենք մինչև 2030թ ծրագրի նախագիծը: Այն փետրվար ամսին ներկայացվեց հանրային քննարկման և հիմա ԿԳՄՍ նախարարությունը հավանաբար քննարկումներ է անում այդ փոփոխությունների հիման վրա: Առաջիկայում կներկայացվի կառավարություն, այնուհետև ԱԺ»,- այս մասին այսօր «Կրթության և գիտության ռազմավարություն. ինչու՞ մինչ օրս չունենք» թեմայով քննարկման ժամանակ նշեց կրթության փորձագետ Սերոբ Խաչատրյանը:

Նրա խոսքով՝ ծրագրի հետ կապված չարչրկված գործընթաց եղավ, որը սկսվել էր դեռևս 2015 թվականից: Այդ ժամանակ սկսվեց 2016-25թթ ծրագրի մշակումը, հետո եղան 2-3 նախագծեր. «Դրանցից մեկը նույնիսկ հասավ հանրային քննարկման նախնական փուլերի: Սակայն, 2018թ.-ից հետո նախագիծը չեղյալ հայտարարվեց, և սկսվեցին նոր գործընթացներ, տարբեր վայրիվերումներ: Եղավ մի պահ, որ ԿԳՄՍ նախարարությունն ասում էր` գուցե մեզ պետք չէ ունենալ ռազմավարություն, մենք կփորձենք կառավարության ծրագրերով համակարգը կարգավորել, բայց ի վերջո որոշվեց, այնուամենայնիվ, ունենալ այդ ռազմավարությունը»:

Սերոբյանն ընդգծեց, որ կրթության կառավարման համակարգում չունենք ռազմավարական ուղղությամբ մտածող մարդկային ռեսուրս. «Ինչու է նախարարությունն անընդհատ ձգձգում այս փաստաթղթի պատրաստումը: Իմ կարծիքով՝ պատճառն այն է, որ չունենք մարդկային բավարար կապիտալ, որը կմտածի ռազմավարական մակարդակով: Ավելին, նույնիսկ ռազմավարական մակարդակն էլ բավարար չէ, մեզ պետք են մարդիկ, որոնք ոչ միայն կմտածեն ռազմավարական մակարդակով, այլև կպատկերացնեն դրա իրականացումը տեղերում»:

Կրթության փորձագետը փաստեց՝ ԿԳՄՍ նախարարությունը տարբեր փուլերում հրավիրել է փորձագետների, որոնք աշխատել են տարբեր փաստաթղթերի վրա, բայց այդ մոտեցումը միշտ չէ որ արդարացնում է: «Փորձագետներն իրենց աշխատանքը կատարում են, ու երբ պայմանագիրը լրանում է՝ իրենք գնում են: Մինչդեռ շատ կարևոր է ներսի ինստիտուցիոնալ կարողությունը, որ այդ փաստաթուղթը տանի մինչև վերջ և իրականացնի…Կա նաև հարցի մյուս կողմը` կարող է ընդունվել հրաշալի փաստաթուղթ, որը այդպես էլ չիրականացվի»,-նշեց Խաչատրյանը:

Մանրամասները՝ տեսանյութում: