27.03.2026 | 22:30
27 երկրից այցելուներ,հատուկ զեղչեր,բացառիկ գնիջեցումներ․TOON EXPO-ն 6-րդ անգամ անցկացվում է Երևանում
Ազատ ոճի ըմբշամարտի ԵԱ. Արման Անդրեասյանը դուրս է եկել եզրափակիչ
29.03.2022 | 15:02
Ազատ ոճի ըմբիշ, 70 կգ քաշային Արման Անդրեասյանը Հունգարիայի մայրաքաղաք Բուդապեշտում ընթացող Եվրոպայի առաջնությունում դուրս է եկել եզրափակիչ․ տեղեկացնում են ՀՀ ԿԳՄՍՆ-ից։
Այսօր Անդրեասյանը կպայքարի ոսկե մեդալի համար՝ գոտեմարտելով 2017 թվականի աշխարհի չեմպիոն, աշխարհի և Եվրոպայի կրկնակի բրոնզե մեդալակիր, Վրաստանի ներկայացուցիչ Զուրաբ Յակոբիշվիլիի հետ:
Կիսաեզրափակչում Հայաստանի ներկայացուցիչը մրցել է մոլդովացի Նիկոլայ Գրամեզի հետ և 6:2 հաշվով վստահ հաղթանակ տարել:
Եվրոպայի առաջնության բրոնզե մեդալակիրը պայքարը սկսել է 1/8 եզրափակչից, որտեղ 3:1 հաշվով հաղթել է Թուրքիայի ներկայացուցիչ Սելահաթին Կիլիչսալայանին, ապա քառորդ եզրափակչում 5:1 հաշվով առավելության է հասել Գերմանիայի ներկայացուցիչ Քեվին Քրիստոֆեր Հենկելի նկատմամբ:
Հայաստանի մյուս ներկայացուցիչը՝ 57 կգ քաշային Մանվել Խնձրցյանը, Եվրոպայի առաջնությունում կպայքարի բրոնզե մեդալի համար: Վճռորոշ գոտեմարտում նա ուժերը կչափի գերմանացի Նիկլաս Ստեչելի հետ:
Մ23 տարեկանների աշխարհի առաջնության բրոնզե մեդալակիր Արման Ավագյանն էլ սփոփիչ գոտեմարտ կանցկացնի բուլղարացի Միրոսլավ Ստեպանով-Կիրովի հետ և հաղթանակի դեպքում կպայքարի բրոնզե մեդալի համար:
Այսօր պայքարը կսկսի Հայաստանի ևս 3 ներկայացուցիչ:
Եվրոպայի չեմպիոն Արսեն Հարությունյանը (61 կգ) քառորդ եզրափակչում կգոտեմարտի կա՛մ Ֆրանսիայի, կա՛մ Մակեդոնիայի ներկայացուցչի հետ: 74 կգ քաշային կարգում Հրայր Ալիխանյանը 1/8 եզրափակչում կգոտեմարտի Սերբիայի ներկայացուցիչ Հետիկ Ցաբոլովի հետ, իսկ 92 կգ քաշային Հովհաննես Մխիթարյանը մեկնարկային գոտեմարտում ուժերը կչափի Վրաստանի ներկայացուցիչ Միրիանի Մայսուրադձեի հետ:
Երեկ պայքարի դուրս եկած Գևորգ Թադևոսյանը (65 կգ) լքել է պայքարը:
