ՌԴ-ն փորձում է ճեղքել Կիևի պաշտպանությունը․ Ուկրաինայի Գլխավոր շտաբ

Ուկրաինացի զինվորականները շարունակում են պաշտպանական գործողությունները արևելյան, հարավ-արևելյան և հյուսիս-արևելյան ուղղություններով։ Այս մասին մարտի 28-ի առավոտյան հաշվետվության մեջ հայտնել է Ուկրաինայի Գլխավոր շտաբը, գրում է korrespondent-ը։ Տոպոլսկոյե, Կամենկա, Սուխայա Կամենկա բնակավայրերի տարածքներում շարունակվում են պաշտպանական մարտերը։ Ըստ գլխավոր շտաբի՝ Ուկրաինայի զինված ուժերը արդյունավետ կերպով զսպում են հակառակորդի առաջխաղացումը Հուլյայպոլի և Զապորոժիեի ուղղություններով։ Ավդեևկայի ուղղությամբ ուկրաինացի զինվորականները հետ են մղել ռուսական զորքերի գրոհը։ Կիևի մատույցներում ռուսական զորքը փորձում է հյուսիս-արևմուտքից և արևելքից ճեղքել պաշտպանությունը և հսկողության տակ առնել առանցքային ճանապարհներն ու բնակավայրերը։ Հարավում Ուկրաինայի Զինված ուժերի հիմնական ջանքերը կենտրոնացած են Կրիվոյ Ռոգի, Զապորոժիեի և Նիկոլաևի պաշտպանությունը կազմակերպելու վրա՝ պահելով ծովափի որոշ հատվածներ։

Տեղեկացվում է, որ Դոնեցկի և Լուգանսկի ուղղություններում հետ է մղվել ՌԴ 5 հարձակում, ոչնչացվել են ռուսական երկու տանկ, հետևակի մարտական մեքենա և մեկ մեքենա։

Նախորդ օրվա ընթացքում Ուկրաինայի զինված ուժերի ռազմաօդային ուժերը ոչնչացրել են չորս ինքնաթիռ, մեկ ուղղաթիռ, տարբեր տեսակի երկու անօդաչու թռչող սարք և երկու թևավոր հրթիռ։

Ըստ ուկրաինական կողմի՝ մարտի 27-ի դրությամբ Ռուսաստանի Դաշնությունը Ուկրաինայում կորցրել է 16600 զինվոր, ինչպես նաև 582 տանկ, 127 ուղղաթիռ և 121 ինքնաթիռ։