Պատերազմին դեմ լինելը ցանկացած բանական մարդու սրբազան պարտականությունն է. ապոլիտիկ զրույց Հասմիկ Պապյանի հետ․ ՏԵՍԱՆՅՈՒԹ

Factor TV-ի A-politic հաղորդաշարի հյուրն է Երևանի պետական կոնսերվատորիայի Օպերային ստուդիայի գեղարվեստական ղեկավար Հասմիկ Պապյանը՝ երգչուհի, որը հանդես է եկել աշխարհի մի քանի տասնյակ ամենահեղինակավոր օպերային հարթակներում: Անդրադառնալով հարցին, թե ինչո՞ւ են լրատվամիջոցներում և սոցցանցերում գերակշռում քաղաքական և կենցաղային սկանդալները, հաղորդման հյուրն արձանագրում է, որ դա արտացոլում է մեր հասարակության վիճակը: Բայց մարդկանց վարքագիծը, ըստ Հասմիկ Պապյանի, հնարավոր է փոխել, միայն թե դրա համար անհրաժեշտ է պետական հստակ քաղաքականություն:

Ի պատասխան հարցին՝ արդյո՞ք ռուսաստանցի արվեստագետները պարտավոր են դիրքորոշում արտահայտել իրենց երկրի կողմից վարվող պատերազմի մասին, Հասմիկ Պապյանը նշում է, որ ոչ միայն արվեստագետը, այլև ցանկացած բանական մարդ պետք է դեմ լինի պատերազմին: Factor TV-ի զրուցակիցը հիշեցնում է, որ, մասնավորապես, հանրահայտ երգչուհի Աննա Նետրեբկոն վերջին նախագահական ընտրություններում Պուտինի վստահված անձն էր,  հետևաբար, իր չափով պատասխանատվություն է կրում իր երկրի նախագահի քաղաքականության համար: Հայ արվեստագետի կարծիքով՝ քաղաքացի լինելը արվեստագետի պարտքն է:

Հասմիկ Պապյանը կարևորում է Հայաստանի մշակութային և, ընդհանրապես, հասարակական կյանքի արդիականացումը և կարծում է, որ այդ նպատակի իրագործումը հնարավոր է այն դեպքում, եթե բարձր մակարդակով որոշումներ կայացնողներն առաջնորդվեն ժամանակակից աշխարհի հրամայականներով:

Մանրամասները՝ տեսանյութում: