08.06.2026 | 21:45
Ջրվեժի գերեզմանատան մոտ մեքենա է այրվել
ԱՄՆ-ն և ԵՄ-ն Ռուսաստանին մեղադրում են ռազմական հանցագործությունների մեջ
Քաղաքականություն
24.03.2022 | 10:54
ԱՄՆ իշխանությունները ապացույցներ են հավաքել Ուկրաինայի դեմ պատերազմի ընթացքում ռուս զինվորականների ռազմական հանցագործությունների մասին։ Այս մասին հայտարարել է ԱՄՆ պետքարտուղար Էնթոնի Բլինքենը, գրում է DW-ի ռուսական ծառայությունը։
«ԱՄՆ կառավարությունը, հիմնվելով ներկայումս առկա տեղեկատվության վրա, եկել է այն եզրակացությանը, որ ռուսական զինված ուժերը ռազմական հանցագործություններ են կատարել Ուկրաինայում»,- ասել է նա։ Բլինքենի խոսքով, կան բազմաթիվ արժանահավատ ապացույցներ անկանոն գնդակոծությունների, խաղաղ բնակչության վրա հարձակումների և այլ հանցագործությունների մասին:
Ամերիկյան գնահատականները հիմնված են ինչպես բաց աղբյուրների, այնպես էլ՝ հետախուզական գործակալությունների տվյալների վրա: Մասնավորապես, Բլինքենը ռուս զինվորականներին մեղադրել է տներ, դպրոցներ, հիվանդանոցներ, կարևոր ենթակառուցվածքներ, քաղաքացիական մեքենաներ, առևտրի կենտրոններ և շտապօգնության մեքենաներ ոչնչացնելու, ինչպես նաև հազարավոր խաղաղ բնակիչների սպանության և վնասվածքներ հասցնելու մեջ:
Նմանատիպ փաստերի առկայության մասին է խոսել նաև Եվրոպական խորհրդի ղեկավար Շառլ Միշելը. «Մենք տեսնում ենք, որ Ռուսաստանը հիմնականում հարվածներ է հասցնում խաղաղ բնակչությանը՝ թիրախավորելով հիվանդանոցները, դպրոցները, հումանիտար միջանցքները»։ Նա նաև կոչ է արել անհապաղ դադարեցնել նման հանցավոր մարտավարությունը։
