08.06.2026 | 12:48
ԲՀԿ-ն չի հաղթահարում անցողիկ շեմը՝ ըստ ԿԸՀ-ի նախնական արդյունքների
Ալեքսեյ Նավալնին դատապարտվեց 9 տարվա ազատազրկման
Քաղաքականություն
22.03.2022 | 16:42
Լեֆորտովոյի դատարանը Վլադիմիրի մարզում տեղի ունեցած արտագնա հանդիպման ժամանակ ռուսաստանցի ընդդիմադիր գործիչ Ալեքսեյ Նավալնիին դատապարտել է 9 տարվա ազատազրկման խիստ ռեժիմի գաղութում՝ 1,2 մլն ռուբլի տուգանքով, հայտնում է Մեդիա զոնան։
Ռուսական լրատվամիջոցների հաղորդմամբ՝ դատարանն ընդդիմադիր գործչին մեղավոր է ճանաչել «առանձնապես խոշոր չափերի խարդախության համար»։
Անցյալ շաբաթ դատախազը պահանջել էր Ալեքսեյ Նավալնիին մեղավոր ճանաչել «խարդախության և դատարանի նկատմամբ արհամարհական վերաբերմունքի մեջ» ու դատապարտել 13 տարվա ազատազրկման խիստ ռեժիմի գաղութում։ Մեղադրող կողմը նաև խնդրել է քաղաքական գործչից բռնագանձել 1,2 միլիոն ռուբլի տուգանք։
«Ինձ չի հետաքրքրում, եթե նույնիսկ դուք պահանջեք 113 տարի, չեք վախեցնի ինձ կամ ինձ նման մարդկանց»,- մարտի 15-ին տեղի ունեցած դատավարության ժամանակ հնչեցրած իր վերջին խոսքում հայտարարել է Նավալնին։
Հիշեցնենք՝ ՌԴ վարչակազմի ընդդիմադիր Ալեքսեյ Նավալնին ձերբակալվել է 2021 թվականի հունվարի 17-ին՝ Գերմանիայից Մոսկվա վերադառնալուց հետո, որտեղ բուժման և վերականգնողական կուրս էր անցնում «Նովիչոկ»-ով թունավորվելուց հետո։ Փետրվարին Իվ Ռոշեի գործով պայմանական ազատազրկումը դատարանը փոխարինել է իրականով։ Ընդդիմադիր գործիչը պետք է կալանքի տակ անցկացնի 2 տարի 6 ամիս։ Մոսկվայի Լեֆորտովոյի շրջանային դատարանը փետրվարի 2-ին քրեական գործ էր հարուցել ընդդիմադիր գործչի նկատմամբ՝ «խարդախության և դատարանի նկատմամբ անհարգալից վերաբերմունքի» վերաբերյալ։
Ալեքսեյ Նավալնին համարվում է ՌԴ նախագահ Վլադիմիր Պուտինի գլխավոր քաղաքական ընդդիմախոսը։ Նա տարիներ շարունակ հանդես է եկել Պուտինի վարչակազմի կոռուպցիոն հանցագործությունների և այլ ապօրինությունների մասին հրապարակումներով ու ենթարկվել քաղաքական հետապնդման։
