16.09.2026 | 19:50
Նիժնի Տապըռի գեղ եք ուզում, որ ոնց ուզեք՝ ձեր «Մայբախ»-ները քշեք. Փաշինյան
Ճապոնիան արձագանքել է Կուրիլյան կղզիների շուրջ բանակցություններից դուրս գալու՝ ՌԴ որոշմանը
Քաղաքականություն
22.03.2022 | 16:54
Ճապոնիայի իշխանությունները կտրուկ են արձագանքել խաղաղության պայմանագրի շուրջ բանակցություններից Ռուսաստանի դուրս գալու որոշմանն ու վիճելի Կուրիլյան կղզիների հետ կապված համատեղ տնտեսական նախագծերի սառեցմանը։ Ճապոնիայի վարչապետ Ֆումիո Կիշիդան ՌԴ որոշումն անվանել է «անարդար» և «բացարձակ անընդունելի», գրում է CNN-ը։
Նշենք, որ ՌԴ-ն այդ քայլին դիմել է պատժամիջոցների պատճառով, որոնք Տոկիոն կիրառել է Ուկրաինայում Ռուսաստանի սանձազերծած պատերազմի կապակցությամբ։
«Այս ամբողջ իրավիճակը ստեղծվել է Ուկրաինա Ռուսաստանի ներխուժման պատճառով, և Մոսկվայի արձագանքը՝ այն մղել Ճապոնիա-Ռուսաստան հարաբերություններ, խիստ անարդար է և բացարձակ անընդունելի։ Ճապոնիան պետք է վճռականորեն շարունակի Ռուսաստանի դեմ պատժամիջոցները՝ համագործակցելով մնացած աշխարհի հետ»,- ասել է նա։
Կիշիդան նշել է, որ Ճապոնիան սկսել է Ուկրաինայից փախստականների ընդունել, և հանրությանն աջակցության կոչ է արել։
Մինչ այդ էլ, Տոկիոյում ՌԴ դեսպան Միխայիլ Գալուզինը կանչվել է Ճապոնիայի ԱԳՆ, որտեղ նրան բողոք են ներկայացրել խաղաղության պայմանագրի շուրջ երկխոսությունից դուրս գալու Մոսկվայի որոշումից հետո։ Նշվում է, որ ՌԴ դեսպանին բողոքի նոտան հղել է Ճապոնիայի ԱԳ փոխնախարար Տակեո Մորին։
Հիշեցնենք, որ Ռուսաստանը և Ճապոնիան Երկրորդ համաշխարհային պատերազմի ավարտից հետո դեռևս չեն կարողանում հարթել Ճապոնիայի ամենահյուսիսային Հոկայդո կղզու մոտ գտնվող կղզիների հետ կապված տարաձայնություններ, որը Ռուսաստանում հայտնի է որպես Կուրիլներ, իսկ Ճապոնիայում՝ Հյուսիսային տարածքներ: Կղզիները Խորհրդային Միության կողմից գրավվել են Երկրորդ համաշխարհային պատերազմի ավարտին։
Տաթև Ֆռանգյան
