26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Բրյուսելում ՆԱՏՕ-ի գագաթնաժողովում նախատեսվում է Բայդեն-Էրդողան հանդիպումը
Քաղաքականություն
22.03.2022 | 13:10
Թուրքիայի նախագահ Ռեջեփ Թայիփ Էրդողանը հինգշաբթի Բրյուսելում մասնակցելու է ՆԱՏՕ-ի անդամ երկրների ղեկավարների գագաթնաժողովին, որի շրջանակում հանդիպելու է նաև ԱՄՆ նախագահ Ջո Բայդենի հետ։ Այս մասին լրագրողների հետ զրույցում հայտարարել է Էրդողանի մամուլի խոսնակ, գլխավոր խորհրդական Իբրահիմ Քալընը, գրում են թուրքական լրատվամիջոցները։
Գագաթնաժողովում ՆԱՏՕ-ի ղեկավարները կարծիքներ են փոխանակելու Ռուսաստանի և Ուկրաինայի միջև տեղի ունեցածի ու հետագա անելիքների շուրջ։
Քալընը լրագրողներին նաև ասել է, որ այսօր պատրաստվում է հեռախոսազրույց ունենալ ԱՄՆ նախագահի ազգային անվտանգության հարցերով խորհրդական Ջեյք Սալիվանի հետ։
Հարցին՝ արդյո՞ք տեղի է ունենալու Էրդողանի հանդիպումը Ջո Բայդենի հետ, Քալընը պատասխանել է․ «Այո, կլինեն երկկողմ հանդիպումներ ԱՄՆ նախագահի և այլ առաջնորդների հետ, որոնք մասնակցելու են գագաթնաժողովին»։
Նշենք, որ Բայդենի և Էրդողանի հեռախոսազրույցը տեղի է ունեցել մարտի 10-ին, իսկ վերջին դեմ առ դեմ հանդիպումը կայացել է 2021 թվականի հոկտեմբերին Հռոմում՝ G20-ի գագաթնաժողովի շրջանակում։
Էմմա Չոբանյան
