18.08.2026 | 14:07
ՄԻՊ-ը մտահոգիչ է համարում նորածնի լուսանկարների և տեսանյութերի տարածում, որոնք արվել են բուժօգնություն ստանալու ընթացքում
Մենք էլ մեր առաջարկներն ենք ներկայացրել Ադրբեջանին, Արցախի կոնֆլիկտը չի ավարտվել. կարգավիճակի հարց կա․ ՏԵՍԱՆՅՈՒԹ
Քաղաքականություն
18.03.2022 | 16:46
«Ադրբեջանը ներկայացրել է բանակցություններ սկսելու համար իր համար ընդունելի առաջարկները, որոնց շուրջ պետք է խոսել։ Եվ այստեղ պարզ տրամաբանություն է, որ մենք էլ մեր առաջարկներն ենք ներկայացնելու»,- այս մասին լրագրողների հետ ճեպազրույցում ասաց ԱԺ Եվրոպական ինտեգրման հարցերի մշտական հանձնաժողովի նախագահ Արման Եղոյանը։
«Շատ տարօրինակ կլինի գնալ բանակցության՝ առանց առաջարկի, ուղղակի քննարկել իրենց առաջարկները։ Օրինակ՝ 5-րդ կետը՝ ապաշրջափակումը դա մեր օրակարգն էլ է։ Դեմարկացիա-դելիմիտացիան դա էլի որոշակի պայմաններով մեր օրակարգն է։ Մյուս օրակարգերն արդեն մեր օրակարգերը չեն։ Տարածքային ամբողջականությունը մի հարց է, Արցախի հարցը այլ հարց է, դրանք երկու տարբեր հարցեր են»։
Հարցին, թե Հայաստանի «կարմիր գիծը» ո՞րն է, Արման Եղոյանը պատասխանեց․ «Կոնֆլիկտը չի ավարտվել, Արցախի կարգավիճակը դեռ որոշված չէ, Մինսկի խմբի համանախագահության կողմից Արցախի խնդրի կարգավորման հիմքում դրված երեք սկզբունքներից մեկն արդեն խախտվել է՝ ուժի չկիրառման սկզբունքը։ Եվ չի կարելի թույլ տալ, որ մյուս սկզբունքը, այն է՝ ազգերի ինքնորոշման սկզբունքն էլ խախտվի»։
Եղոյանի խոսքով՝ Մինսկի խմբի համանախագահության մեջ գտնվող երկրները հենց հիմա ակտիվ կոնֆլիկտի մեջ են գտնվում միմյանց հետ։ «Այս առումով հիմա մի քիչ դժվար փուլ է, բայց Արցախի հարցն այն գերկարևոր համաշխարհային ռազմավարական բալանսին վերաբերող հարցերից է, որի վերաբերյալ միջուկային գերտերությունները, ՄԱԿ-ի անվտանգության խորհրդի մշտական անդամներն ունենում են առանձին խոսակցություն։ Ես համոզված եմ, որ Արցախի վերաբերյալ Մինսկի խմբի համանախագահողներն ունենում են առանձին խոսակցություն համաշխարհային ռազմավարական բալանսի կոնտեքստում, որը պետք չէ խառնել մարտավարական բախումների հետ աշխարհի տարբեր կետերում։ Կարծում եմ՝ այդ ձևաչափը, եթե ոչ այսօր, ապա կարճաժամկետ կտրվածքում նորից կսկսի աշխատել»,- նշեց պատգամավորը:
Անդրադառնալով հարցին, թե Արցախի՝ Ադրբեջանի կազմում լինելու հարցը քննարկման ենթակա՞ է, թե ոչ, Արման Եղոյանը պատասխանեց, որ երբ սկսվում են բանակցություններ, ամեն մեկը գալիս է, սեղանին դնում է իր օրակարգը:
«Մեր պատասխանը լինելու է այն, որ Արցախի հարցը պետք է կարգավորվի Մինսկի խմբի համանախագահության առաջարկած՝ երեք հիմնարար սկզբունքների շրջանակում»,- նշեց Եղոյանը:
Մանրամասները՝ տեսանյութում:
