06.10.2026 | 16:30
ԱԺ-ում հայտարարությունների ժամ է. ՈՒՂԻՂ
Անվճար կրթություն՝ մարտական գործողություններում հաշմանդամություն ստացած զինծառայողներին․ նախագիծ․ ՏԵՍԱՆՅՈՒԹ
Հասարակություն
15.03.2022 | 10:52
Ժ պաշտպանության և անվտանգության հարցերի հանձնաժողովի այսօրվա նիստում այսօր քննարկվեց «Զինվորական ծառայության և զինծառայողի կարգավիճակի մասին» օրենքում փոփոխություն և լրացում կատարելու մասին նախագիծը, որը վերաբերում է կրթության իրավունքի իրացմանը։
Նախագծի հեղինակ, «Պատիվ ունեմ» խմբակցության պատգամավոր Տիգրան Աբրահամյանը ներկայացրեց, թե ինչ փոփոխություններ են նախատեսված նախագծով․ «Գործող օրենքը սահմանում է, որ մարտական խնդիր կատարելիս, եթե պարտադիր ժամկետային զինծառայողը ստանում է առաջին կամ երկրորդ կարգի հաշմանդամություն, կարող է օգտվել նաև կրթության անվճար իրավունքից։ Առաջարկվող փոփոխությամբ դա կվերաբերի ոչ միայն հաշմանդամություն ձեռք բերած ժամկետային, այլև պայմանագրային զինծառայողներին, այդ թվում՝ սպաներին։ Չեմ կարծում, որ սա քննարկելու երկար բան է ենթադրում։ Նույն պայմաններում մարտական խնդիր կատարած և հաշմանդամություն ստացած պայմանագրային զինծառայողները ևս պետք է հնարավորություն ունենան օգտվելու կրթությունից»։
Աբրահամյանի խոսքով՝ մյուս փոփոխությունը վերաբերում է քսան տարվա ծառայություն անցած և այս պահին երկարամյա կենսաթոշակի պայմաններում գտնվող սպաներին․ «Ունենում ենք իրավիճակ, երբ կադրային սպան պայմանական 37-38 տարեկան է և հիմնականում ռազմական մասնագիտություն է ստացել։ Քաղաքացիական կյանք մտնելու համար կարիք կա նրանց ապահովելու կրթությամբ։ Նրանց երկրում պահելու խնդիր կա, արտագաղթը բացառելու։ Նրանք հնարավորություն պետք է ստանան մագիստրատուրայի կամ ասպիրանտուրայի պայմաններում ստանալ մասնագիտություն և ունենալ ապրուստի արժանապատիվ պայմաններ։ Կան որոշակի խնդիրներ հատկապես ծառայությունից հետո քաղաքացիական կյանք մտնելու հարցում։ Սա քննարկել ենք պահեստազորի սպաների և հանձնաժողովի փորձագետների հետ»։
Մանրամասները՝ տեսանյութում:
