Ծիծաղելի է. Ավանեսյանը հերքում է, թե աղին առնչվող նախագծի համար դրամաշնորհ են ստացել․ ՏԵՍԱՆՅՈՒԹ

ՀՀ առողջապահության նախարար Անահիտ Ավանեսյանը վերահաստատում է՝ հանրային սննդի կետերում սեղաններին աղամաններ չդնելու օրինագծով նպատակ ունեն պաշտպանել քաղաքացիների առողջությունը, ինչի համար հետևողական պայքար են տանելու: Նախարար Ավանեսյանն այս մասին ասաց ՀՀ ազգային ժողովի մարդու իրավունքների պաշտպանության և հանրային հարցերի մշտական հանձնաժողովի նիստում՝ անդրադառնալով «Հայաստան» խմբակցության պատգամավոր Արեգնազ Մանուկյանի հարցին:

«Հայաստան» խմբակցության պատգամավոր Արեգնազ Մանուկյանը հետաքրքրվեց՝ արդյոք աղի դեմ հակաքարոզչություն իրականացնելու համար Ավանեսյանը դրամաշնորհ ստացե՞լ է, կամ նախարարությունը ստացե՞լ է, ու եթե ստացել են, ո՞ր կազմակերպությունից:

Նախարարը պատասխանեց. «Առողջապահության նախարարությունը և կառավարությունը ունի հանձնառություն՝ պաշտպանելու քաղաքացիների կյանքն ու առողջությունը, բարելավելու առողջությունը, կանխարգելելու,  հայտնաբերելու հիվանդությունները ու դրանք բուժելու: Եթե երկիրը իր քաղաքացիների առողջության պահպանման մեջ ներդրում չի անում, պետք է նորանոր միջոցներ ներգրավի բուժման, հաշմանդամության համար, ու երբեմն այնքան ծանրացած են լինում, որ չի հաջողվում կյանքը փրկել: Ես ստանում եմ աշխատավարձ՝ իրականացնելու այդ ոլորտի լիազոր մարմնի կառավարումը, հավելյալ միջոցների մասին խոսելը ծիծաղելի է: Մենք հետևողականորեն քաղաքացիների առողջության պահպանման մարտավարություն ենք տանելու: Մենք պետք է առողջ սնվենք, մարզվենք, որ ստիպված չլինենք հիվանդաբուժությամբ զբաղվել»:

Մանուկյանը արձագանքեց. «Դուք մտահոգություն էիք հայտնում, որ մարդիկ ճաշի մեջ աղը լցնում են՝ առանց փորձելու, հնարավո՞ր է նախաձեռնությամբ հանդես գաք՝ քրեական պատասխանատվության ենթարկել մարդկանց՝ ճաշի մեջ առանց համտեսելու աղ լցնելու համար»:

Ավանեսյանը պատասխանեց. «Եթե ձեր քաղաքական ուժը այդպիսի գաղափարներ ունի, խնդրեմ, մտցրեք ձեր կուսակցության ծրագրի մեջ»: Ավանեսյանը վստահեցրեց, որ իրենց նպատակն է, որ մեր քաղաքացիները ունենան առողջ սովորույթներ, երկար պահպանեն իրենց առողջությունը, կյանքի որակը, ոչ թե զբաղվեն հիվանդությունների դեմ պայքարելով:

Մանրամասները՝ տեսանյութում: