Տեսանյութեր
19.04.2018 | 19:39Ընդդիմադիր պատգամավոր Արտակ Զեյնալյանը քաղաքական հարցերին չի պատասխանում։ Մասնավորապես, նա անպատասխան թողեց այն հարցը, թե ինչ են մտածում «Ելք»-ում Հայաստանում ստեղծված վիճակից դուրս գալու մասին:
«Ես կօգտվեմ իմ ազատության իրավունքից և չեմ ընկնի ձեր ծուղակը»,- լրագրողին ասում է ընդդիմադիր պատգամավորը։
Փոխարենը պարոն Զեյնալյանը կասի, որ «Քայլ արա մերժիր Սերժին» շարժման բերման ենթարկված բոլոր քաղաքացիների իրավունքները խախտված են։ Պատգամավորն ինքը ծեծի հետքեր է տեսել բերման ենթարկվածների վրա: «Ոստիկանն իրավունք չունի ցուցարարին ծեծել»,- եզրակացնում է պատգամավորը։
Հայտնի են նաև անչափահասներին բերման ենթարկելու դեպքեր։ Այդ մասին, ըստ Արտակ Զեյնալյանի, տեղյակ չեն պահում ծնողներին, թույլ չեն տալիս հարցաքննվել փաստաբանի ներկայությամբ։ Պատգամավորից հետաքրքրվեցինք՝ պետք է այդ ամենի համար գոնե Վլադիմիր Գասպարյանը հրաժարական տա՝ որպես ոլորտի ներկայացուցիչ։ Քաղաքական մարմնի ներկայացուցիչը, որի ենթական է կառավարությունը, նկատում է, որ դա լրագրողի գործն է, կարող է լրագրողը պահանջել:
«Արտակ Զեյնալյան- Դուք ինձ էդպիսի առաջարկ ներկայացնում եք, որ ես ի՞նչ անեմ։
Լրագրող- Չէ, Ձեր կարծիքը։
Արտակ Զեյնալյան-Գասպարյանը պետք է հրաժարակա՞ն տա։
Լրագրող- Չէ, էն ապօրինությունները, որոնք Դուք նշեցիք, դրանցից հետո կարո՞ղ եք պահանջել։
Արտակ Զեյնալյան- Այդ ապօրինությունների համար պետք է պատասխանատվության ենթարկվեն բոլոր նրանք, որոնք մասնակցել են այդ ապօրինություններին»։
Մհեր Արշակյան
