«Միտինգները խանգարում են երկրի տնտեսական զարգացմանը». Սերժ Սարգսյանի խոսքերը գրեթե նույնությամբ կրկնեց Սուրեն Կարայանը. ՏԵՍԱՆՅՈՒԹ

Կառավարության նիստից հետո լրագրողների հետ հանդիպմանը ՀՀ տնտեսական զարգացման և ներդրումների նախարար Սուրեն Կարայանը պատասխանելով հարցին, թե ընդդիմության գործողություններն արդյոք կազդեն երկրի տնտեսության զարգացման վրա, ասաց. «Ուզում եմ  խոսենք ոչ թե ենթադրություններով, այլ փաստերով: ՀՀ վարչապետ Սերժ Սարգսյանը նշեց, որ 2017թ-ին, երբ որևէ արտառոց դեպք տեղի չունեցավ, մեր տնտեսությունը արձանագրեց 7,5 %-անոց տնտեսական աճ, ընդ որում՝ այդ աճն արձանագրեց ի շնորհիվ արդյունաբերության և ծառայության ոլորտների: Մենք ունեցանք  մոտ 20 %-ով Հայաստան եկող զբոսաշրջիկների այցելությունների աճ,  և նույն թվերը կարող ենք տեսնել նաև 2018 թվականի առաջին եռամսյակում»,-ասաց Կարայանը՝ նշելով, որ այն կարգավիճակում, որոնք տեղի են ունենում ցույցերը բասացական ազդեցություն կունենան զբոսաշրջության զարգացման վրա, քանի որ որոշ երկրներ արդեն հորդորել են իրենց բնակիչներին չայցելել  Հայաստան, քանի որ այստեղ անվտանգ չէ: 

Ըստ նախարարի պաշտոնակատար Սուրեն Կարայանի՝ ընդդիմադիր ցույցերը որևէ ազդեցություն չէին թողնի երկրի տնտեսության բնականոն զարգացման վրա, եթե լինեին տրամաբանական և չխաթարեին երկրի բնականոն զարգացումը, չպարալիզացնեին  զբոսաշրջիկների տեղաշարժը: 

Հիշեցնենք, որ ՀՀ վարչապետ Սերժ Սարգսյանը երեկ հարցազրույց էր տվել  Շանթ ՀԸ-ին ու նշել, որ երբ երկրում միտինգներ կան, ապա այդ երկիր այցելությունների թիվը նվազում է:

«Եթե միտինգները լինեին տրամաբանական և չխանգարեին երկրի բնականոն զարգացմանը, ապա տնտական աճի վրա ազդեցություն չէին ունենա»,- գրեթե նույնությամբ վարչապետի մտքերը կրկնեց նախարարը:

Մանրամասները՝ տեսանյութում: