Նոր հարցեր պատերազմի քննիչ հանձնաժողովի կազմի շուրջ. ովքե՞ր կմասնակցեն փակ նիստերին․ ՏԵՍԱՆՅՈՒԹ

44-օրյա պատերազմի հանգամանքներն ուսումնասիրող քննիչ հանձնաժողովի աշխատանքներում ներգրավված կլինի արտախորհրդարանական ընդդիմությունից երեք ներկայացուցիչ: Կազմը քննարկվել և հաստատվել է Նիկոլ Փաշինյանի մասնակցությամբ:

«Արդար Հայաստան» կուսակցության ղեկավար Նորայր Նորիկյանի փոխանցմամբ՝ իր, «Ինքնիշխան Հայաստան» կուսակցության ղեկավար Դավիթ Սանասարյանի և Արցախի ԱԽ նախկին քարտուղար, «Ազատական» կուսակցության ղեկավար Սամվել Բաբայանի մասնակցության հարցը Փաշինյանի հետ քննարկել են վարչապետի և արտախորհրդարանական ուժերի միջև պարբերաբար տեղի ունեցող հանդիպման ընթացքում:

Թե խորհրդարան չանցած ուժերն իրավական ի՞նչ կարգավորմամբ են մասնակցելու հանձնաժողովի նիստերին, առայժմ անհայտ է: ԱԺ կանոնակարգ սահմանադրական օրենքը թույլ է տալիս քննիչ հանձնաժողովի կազմում ընդգրկել միայն ոլորտային հանձնաժողովների պատգամավորներին: Իշխանական պատգամավոր, քննիչ հանձնաժողովը ղեկավարող Անդրանիկ Քոչարյանն իրավական լուծումների մասին այսօր ոչինչ չասաց:

Նրա խոսքով՝ հավանաբար հաջորդ երկուշաբթի հանձնաժողովը ևս մեկ դռնբաց նիստ կհրավիրի, որտեղ կքննարկվեն արտախորհրդարանական ընդդիմությանը հանձնաժողովի աշխատանքներում ընդգրկելու տարբերակները: Մինչ այդ, Նորայր Նորիկյանը նշում է՝ ոչ լեգիտիմ ճանապարհով գործընթացի մասնակից չեն դառնա: Արտախորհրդանական ուժերի ներկայացուցիչները հանձնաժողովից լիարժեք լիազորություններով անդամակցություն են ակնկալում:

Մինչ այս քննիչ հանձնաժողովի աշխատանքները բոյկոտած խորհրդարանական ընդդիմությունը սուր քննադատում է Սամվել Բաբայանի և մյուսների մասնակցությունը: «Հայաստան» խմբակցության ղեկավար Սեյրան Օհանյանը նշում է, որ քննիչ հանձնաժողովն այսպիսի կազմով միտում ունի ուշադրությունը շեղել իրական խնդիրներից և պատասխանատվությունն ուղղել բանակի կողմը:

Հանձնաժողովի նախագահ Անդրանիկ Քոչարյանը, մինչդեռ, Սամվել Բաբայանի մասնակցությունը կարևոր է համարում. «Շատերն անհանգստացած են Սամվել Բաբայանի մասնակցության մասին լսելուց, ես չեմ հասկանում, թե ինչու են վախենում և ասում, որ շահերի բախում կա: Չկա նման բան»։

Հիշեցնենք, որ Սամվել Բաբայանը պատերազմի շրջանում զբաղեցրել է Արցախի Անվտանգության խորհրդի նախագահի պաշտոնը, ասել է թե՝ եղել է կարևոր դերակատար։ Բաբայանը հրաժարական է տվել պատերազմի ավարտից անմիջապես հետո։

Այս հանգամանքի վրա ուշադրություն հրավիրող Սեյրան Օհանյանը դեմ է նաև իր նախկին խոսնակ Արծրուն Հովհաննիսյանի՝ քննիչ հանձնաժողովում ներգրավվելուն։ Արծրուն Հովհաննիսյանը, հիշեցնենք, ՀՀ ՊՆ խոսնակի պարտականությունները կատարել է 2012-2020 թվականներին, իսկ 44-օրյա պատերազմի ընթացքում հանդես է եկել որպես ՊՆ ներկայացուցիչ՝ հանդիսանալով պաշտոնական քարոզչության թիվ մեկ դեմքը։

Փորձագետներից ու արտախորհրդարանական ուժերից զատ՝ հանձնաժողովի կազմում մշտական անդամի կարգավիճակով ներառված կլինեն նաև զոհված ու անհետ կորած զինծառայողների ծնողներ:

Թե հանձնաժողովն այս կազմով ի՞նչ բացահայտումներ կանի և արդյո՞ք այն կմատնանշի պատերազմի պարտության մեղավորներին, դժվար է կանխատեսել: Համենայնդեպս, քննիչ հանձնաժողովի նախագահը հայտարարում է, որ իրենց նպատակը մեղավորներ գտնելը չէ:

Մանրամասները՝ տեսանյութում։

Նարեկ Կիրակոսյան